Закрыть
Логин:
Пароль:
Забыли свой пароль?

Войти    

Тываның Баштыңы республиканың чурттакчыларынга от-биле оваарымчалыг болурунче кыйгырган

Тываның Баштыңы республиканың чурттакчыларынга от-биле оваарымчалыг  болурунче кыйгырган 23.04.2019
Тывада бүрүткеттинген 18 хову өрттериниң 14-үнде кижилер буруулуг. РФ-тиң ОБЯ республикада эргелели регион баштыңы Шолбан Кара-оолга ооң дугайында илеткээн.
Апрель 22-ге чедир өөскээн өрттер от-биле серемчилел чогундан, а бирээзи бичии уругларның опчок чоруундан болган. Өрт өөскүткен дээш кеземчеге онаажып болур дугайында сагындырыгларны кылып турза-даа, кургаг оът-сигенни өрттеткенинден хову шөлдер когараан. Чурттакчылыг черлерни долгандыр 5 километр зонада черлер өрттенип, ол 30 хуу хирезин шыва алган болза, буруулуг кижилерни тодарадыр ажылдар чоруп турар.
Тываның Баштыңы Шолбан Кара-оол республиканың чурттакчы чонунга кургаг оът-сигенни өрттетпезин кыйгырган. «Забайкальеде коргунчуг айыыл-халап болганын көрдүңер ыйнаан. Бистиң өртке удур албаннарывыс байдалды хайгаарап, ажылды чорудуп турар. Он ажыг өрттү өжүрген. Улуг-хүнде республикага улуг чаъс чагганы байдалды чүгээртеткен. Ынчаалза-даа серемчилел херек. Часкы агаар бойдусту эки билир силер. Кургаг хаттар бо-ла болгулаар. Бичии-ле кошкаш кынныр болза, хову-шөлдерже өрт шилчип болур. Бурунгу хүн чаа-ла, Кызылды долгандыр 4, Шагаан-Арыг база Ак-Довурак чоогунга 2 өрттү өжүрген. Кургаг сиген өрттеткенинде өрттер үнген. Чоок улустарыңарга, таныш-көрүш, эш-өөрүңерге, уругларга чугаалап, чагып-сургаңар. Боттуң, хүндүлээр кижизиниң чагыг сөстерин ТВ-де азы солунда үнүп турар чарлалдарга канчап деңнээр. Кижиниң чагыг сөстери сеткилинге дээп, амыдыралдың дүрүмнери апаарынга бүзүрээр мен. Ынчан айыыл-халаптан чайлап болур” – деп, ол бодунуң блогунда бижээн.  
Регионнуң ОБЯ эргелелиниң медээзи-биле алырга, амгы үеде Тываның хову-шөлдеринде өрттер чок. Апрельдиң 10-дан 30-ге чедир республиканың бүгү девискээринде өртке удур онза чурумну чарлаан. Бо үеде одаг кыпсыры, бок-когурум, кургаг сиген кыпсыры хоруглуг. Өртке удур онза чурумнуң дүрүмнерин хажытканда, административтиг корум-чурум хоойлузунда көрдүнгени езугаар, буруулуг кижини 2 муңдан 300 муң рубль чедир акшага торгаап болур.

Возврат к списку