Тываның Баштыңы регион чазааның кежигүннеринге РФ-тиң премьер-министриниң даалгаларынга хамаарыштыр ажылды шапкынчыдар даалганы берген

РФ-тиң Чазааның даргазы Д.А. Медведевтиң эрттиргени хуралдың протоколунга хамаарыштыр ажылдаар харыысалгалыг даалгаларны онааган. Республика премьер-министрниң дорт даалгаларын боттуң сонуургалында ажыглаар эптиг арганы алган. Шупту 18 пунктуда даалгаларны, бюджет чагыгларын база техниктиг барымдааларны күүседирде ажылды дүүштүрери-биле федералдыг яамыларже чугула бижик-чагааларны чорударының чурумун база тодаргай графигин тургускан.

 «Март айда Д.А.Медведевке эрткен Тываның хөгжүлде айтырыгларының талазы-биле хуралда 18 пунктулуг протокол даалгазын премьер хүлээп алган. Пункт бүрүзү – федералдыг яамылар болгаш ведомстволар-биле ажылдаар улуг ажыл-херек. Пункт бүрүзүнге техниктиг даалгаларны тургузуп, ооң үндезинин айтып, бадылаткаш, акшаландырыышкынче чагыгларны киирер дээш, он-он ажылдар кылдынган – деп, Тываның Баштыңы Шолбан Кара-оол понедельникте чугаалаан. – Чүгле ооң соонда документилерни ылавылаар, а документилер курлавырны тып, ону тускайлап бээринге үндезин болгаш боттуг ажылды эгелээринге барымдаа болур. Ажыл-чорудулганың чурумун болгаш графигин тодараттывыс, ам ону бичии-даа озалдатпайн, частырыг чокка кылыры силерниң харыысалгаңарда деп, республика чазааның вице-премьерлеринге база сайыттарынга сагындырдым».