Тыва Бүгү-российжи чон чизезинге белеткелди эгелээн

2020 чылда эртер Бүгү-российжи чон чизезинге Тыва белеткенип эгелээн. Республика Чазаа регионга чизе чорудуун белеткээр болгаш эрттирер комиссияны тургускан. Комиссияның персоналдыг составын база бадылаан. Тываның Чазааның Даргазының бирги оралакчызы Александр Брокерт ону удуртур.  

Республика Чазаа шак-ла ындыг хевирлиг комиссияларны муниципалдыг деңнелге тургузарын сүмелээн. 2019 чылдың май 1-ден эгелеп ол ажылдап эгелээр ужурлуг. Бар медээлер баазазын шүүштүрери – комиссияның ажылы ол. Чижээ, чаа туттунган бажыңнарны илередип, бузуп азы өскээр көжүрген бажыңнарны даңзыдан уштур дээш.  

Чон чизези 2010 чылдың октябрь 1-ден 30-ге чедир эртерин сагындыраал. Ону эрттирери ооң мурнунда чылдардан ылгалдыг. Ам ажылдың кол кезиин интернет дузазы-биле кылыр. Күрүне ачы-дузаларының порталында сүмелээн чизе саазынын республиканың чурттакчылары боттары долдурар апарган.  

Чизечилер ооң-биле чергелештир чурттакчыларның бажыңнарын база эргий кезиир. Берген медээлерни улаштыр хынаарын бөдүүнчүдери-биле чизечилерге планшеттерни бээр. Хамаатыларның бо-ла баары черлерге стационарлыг чизе пунктуларын ажыдар. 

Чизе чурттакчы чоннуң санын, эр-херээженин, нациязын, чоннуң ортумак назынын, эртем-билиин, өрегелерниң санын база составын, хамаатыларның орулгаларының дөзүн, экономиктиг идепкейлиг база ажылдап турар чурттакчы чоннуң санын база өске-даа көргүзүглерни илередир.