Тываның Баштыңы РФ-тиң чырыдыышкын сайыды-биле республикага чаа школалар тудар айтырыгны чугаалашкан

Тываның Баштыңы Шолбан Кара-оол бодунуң блогунда, апрель 4-6 хүннеринде Россияның Чазааның даргазы Дмитрий Медведевтиң удуртулгазы-биле эрткен «Национал төлевилелдер – боттаныышкын чадазы» шуулган үезинде, РФ-тиң чырыдыышкын сайыды Ольга Васильева-биле Тывага чаа школалар тудар айтырыгны чугаалашканын бижээн.  

Республика Баштыңы сайыттан акшаландырыышкынның хемчээлин көвүдедир арганы өөренип көөрүн дилээн. 2024 чылга чедир эргижирээн школалар айтырыын төндүр шиитпирлээр дизе, республика чылдың-на 3-тен эвээш эвес школаны тудар ужурлуг, бөгүнде Тывада аргажок эргижирээн 20 хире школа бар. 

Шолбан Кара-оол чер шимчээшкининден когараан 14 дугаар школаның дугайында сайытка чугаалаан. Чер шимчээшкининден камгалап быжыглаар хемчеглерни ап турзажок, бо чылын чаа тудугну эгелээри-биле школаны хаар деп шиитпир үнген. Оон аңгыда найысылалдың солагай талакы дачалар девискээринге чаа школа тудуу эгелээр, а «Южный» микрорайонунда чаа школаны сентябрьга чедир тудуп доозар ужурлуг.