Закрыть
Логин:
Пароль:
Забыли свой пароль?

Войти    

Тываны хөгжүдер айтырыгларлыг хуралды Москвада белеткеп эгелээн

Тываны хөгжүдер айтырыгларлыг хуралды Москвада белеткеп эгелээн 21.03.2019
Тываның Баштыңы Шолбан Кара-оол ажыл-албан аайы-биле Москвада чеде берген. Сургакчылаашкын үезинде, РФ-тиң чазааның аппарады-биле Тываның социал-экономиктиг хөгжүлде айтырыгларын чугаалажып, ону дараазында хуралдың хүн чурумунче киирерин дугуржур планныг. 
Шолбан Кара-оол Красноярск хоорайга Бүгү-делегей Универсиадазының үезинде, Россияның Чазааның Даргазы Дмитрий Медведев-биле республикага хамааржыр аңгы хуралды федералдыг чазак деңнелинге эрттирер дугуржулганы кылганын сагындыраал. 
Тываның эрге-чагыргазы сайгарылгаже киирер айтырыглар санынче, ону боттандырарынга федералдыг чазактың деткимчези херек, бодунуң инфраструктура төлевилелдерин идип үндүрер. Регионнуң транспорт аргыжылгазын чедингир болдурарынче, байлак чиг эт курлавырын шиңгээдиринче, кызыгаарлар аразының кады ажылдажылгазын хандырарынче угланган чугула төлевилелдер бар. 
Республиканың инфраструктура төлевилелдериниң эң колунга – чуртта экономиктиг бергедээшкиннер уржуундан ара доктааткан Кызыл-Курагино демир-оруун тудар төлевилел хамааржыр. Бөгүнде демир-орук тудуунче эглир арга бар, чүге дизе аңаа чүгле Енисей Сибириниң регионнары эвес, а РФ-тиң чөөн талада кожалары – Кыдат биле Моол база сонуургалдыг деп, Шолбан Кара-оол санап турар. Россияның киржип турары «Чаңгыс куржаг – чаңгыс орук» деп евразийжи экономиктиг улуг төлевилелдиң бир адыры Кызыл – Курагино бооп турары анаа эвес.

Возврат к списку