Тываның Баштыңы дааранылга фабриказының коллективинге бүдүрүлгениң тургустунганындан бээр бир чылдааны-биле байырны чедирген

«БТК групп» холдинг-биле кады Кызылда дааранылга бүдүрүлгезин ажытканывыстан бээр, бөгүн бир чыл болган. Күрүнеден, камгалал яамызындан база, хөй чагыглар хүлээп ап турар улуг компанияның структуразында 14 бүдүрүлге бар. Ынчап кээрге бистиң фабрикавыска ажыл кезээде турар. Бо үеде 60 чаңгыс чер-чурттугларывыс ажылдаан бүдүрүлгеде кижилер албан езузу-биле ажылда тургустунган, эки акша-шалыңныг. Бүдүрүлгениң бир чыл болганы-биле даараныкчыларывыска сеткилим ханызындан байырны чедирдим. Чүгле бурунгаар! Бүдүрүлгевисти улгаттырып, пөс рыногун эжелеп, цехти улгаттырарынга эки баазаны тургузуп, чаа ажылчын олуттарны ажыдаалыңар» - деп, Шолбан Кара-оол Контактыда арынында бижээн. 

Ооң мурнунда бичежек мастерскаялар болгаш ательелер чиик үлетпүрүн тургузуп турган болза, фабрика ажыттынган соонда, үлетпүр бүдүрүлгези 3,6 катап улгаткан деп, ТР-ниң Экономика яамызы дыңнаткан. Бүдүрүлге 2018 чылда 347 муң санныг янзы-бүрү кылыгларны үндүрүп, 93,8 млн. рубль орулганы ажылдап алган. Директор Дина Асташева бүдүрүлге чорудуун алгыдар деп турарын чугаалаан. Бажында компания тыва бүдүрүлгеге ажылдаар специалистерни өөредирин организастаар деп турар. 

БТК компанияның бөлүктери – Россияның чиик үлетпүрүнүң улуг холдингизи дээрзин сагындыраал. Компания бедик технологиялыг текстиль, идик-хеп, формалыг хептер, бизнеске тускай хептер, хүннүң кедер хептер, дыштанырда кедер хептерни чогаадып, даарап, ол ышкаш чепсектиг күштерге база үлетпүр бүдүрүлгелеринге тускай идиктерни бүдүрүп турар.  

Холдинг амгы үениң сайзыраңгай бүдүрүлге баазалыг, ында Россия Федерациязында, Беларусь Республикада база Мурнуу Осетия Республикада ажылдыг 14 бүдүрүлге кирген. БТК компаниязының бөлүктери - адырда башкарыкчы ажыл берикчизи. Холдингиде ажылдап турар кижилерниң саны 8 муң ажыг.