Закрыть
Логин:
Пароль:
Забыли свой пароль?

Войти    

Тывага хөй залдыг бирги кинотеатр кинофикация федералдыг программа-биле ажыттынар

Тывага хөй залдыг бирги кинотеатр кинофикация федералдыг программа-биле ажыттынар 22.11.2018
Кинофикация федералдыг программа-биле Тывага хөй залдыг бирги кинотеатрны ажыдар. Республика Баштыңы Шолбан Кара-оолдуң Россия Федерациязының культура сайыды Владимир Мединский-биле ужуражылгазының үезинде ооң дугайында билдинген.
 «Чурттакчы чонга уран чүүлдүң аңгы-аңгы угланыышкыннарын чедингир болдурар дээш, кинофикацияның федералдыг программазынче Тыва Республиканы киирип, амгы үениң хөй залдыг кинотеатры-биле хандырарын саналдап тур мен» — деп, Владимир Мединский чугаалаан.  
Шолбан Кара-оол сайыттың саналынга четтиргенин илереткеш, кинотеатрга оран-саваны көрүп алганын, чоокку үеде ону ажыдып болурун чугаалаан. Тываның Баштыңы ажыдыышкын езулалынче Владимир Мединскийни чалаан. 
Республика Баштыңы Тывада хөй талалыг ажыл-чорудулгалыг баштайгы культура одаа — республика музейиниң экспозициязы — стелларийлиг база янзы-бүрү чогаадыкчы шөлчүгештерлиг Аныяктар ордузун тудар төлевилелди Владимир Мединскийге таныштырган. 
«Стелларий — республика музейиниң өртээ чок төөгүлүг даш көжээлерин делгээн аңгы экспозиция. Культура комплекизинде аныяктарга уран чурулга дээш, өске-даа угланыышкыннарга чогаадыкчы шөлчүгештерни ажыдары көрдүнген» - деп, Шолбан Кара-оол чугаалаан. Аныяктар ордузунуң тудуунда кол ажылдар доозулганын база тайылбырлаан. 
«Филармония биле стелларийлиг Аныяктар ордузу – бирги хереглелдиң объектилери болур школа-даа, эмнелге-даа эвес, ындыг болзажок, ол чокта база хоржок. Ооң кадында, орду тудуу шуут адакталган, ам ону доозуп алыры-биле, федералдыг инвестиция программазынче киирерин чедип алыр дээш, туржуп тур мен. А Тываның күрүне филормониязының оран-савазы, боттарыңар билир силер чаңгыс чер-чурттуглар, республиканың чогаадыкчы башкарыкчы болгаш билдингир коллективтериниң одаа-дыр. Ону соңгаарладып турбайн, эде чаагайжыдып алганы дээре. РФ-тиң культура сайыды Владимир Ростиславович Мединскийге ол болгаш өске-даа чугула айтырыгларны чугаалаарымга, бистиң дилеглеривисти онза кичээнгей-биле хүлээп алды» деп, Тываның Баштыңы бодунуң блогунда ужуражылганың түңнелдерин бижээн.

Возврат к списку