Тываның делегациязы «Россияның транспорту» XII делегей шуулганында киржип турар

Тываның Баштыңы Шолбан Кара-оол удуртулгазы-биле республика делегациязы Москва хоорайда эрттип турар «Россияның транспорту» XII делегей шуулганында киржип турар.  

Бөгүн ол Россияның транспорт сайыды-биле орук-транспорт инфраструктуразын хөгжүдер айтырыглар чугаалашкан «Ажыл-агыйжы эртенги чемге» киришкен. Транссибтиң тыва адыры – «Кызыл – Курагино» демир-орук тудуу кирген Сибирьниң транспорт коммуникацияларының төлевилелдерин чугааның өске киржикчилери сайгарган.

Республика Баштыңының интернет-блогунда парлаан чүүлүнден алырга, орук тудуун 2019 чылдан эгелеп уламчылаар. Россияның демир-оруктарының баштаар чериниң даргазы Олег Белозеров бодунуң чугаазында, РФ-тиң Президентизиниң май чарлыктарын күүседири-биле ажылдап кылган Орук инфраструктуразын модернизастаар болгаш калбартыр комплекстиг планда мурнады боттандырар айтырыгларда «Кызыл – Курагино» төлевилелди айытканын Шолбан Кара-оол демдеглээн.  

«Россияның демир-оруктарының удуртукчузу Белозеров Олег Валентинович Курагино-Кызыл демир-орук тудуун тудар төлевилелди уламчылаарын ам чаа чугаалады. Ынаар кичээнгейни углаар херек, чүге дизе РДО амдыгаа дээр төлевилелдиң дорт киржикчизи болбайн турган» - деп, Шолбан Кара-оол Контактыда бодунуң арынында бижээн.

 Шуулган ажылында киржип турар Тываның орук-транспорт комплекизиниң сайыды Олег Бады, республика баштыңы РФ-тиң транспорт сайыды Евгений Дитрих-биле хүннүң ийиги чартыында ужуражырын дыңнаткан. Шолбан Кара-оол ооң-биле «Айыыл чок болгаш шынарлыг оруктар» национал төлевилелге Тываның киржир санал-оналдарын база транспорт инфраструктура адырында республиканың кол төлевилелдерин сайгарар планныг.