Москвада сургакчылап турар Тываның Баштыңы Красноярскиниң экономиктиг шуулганы-2019-ту белеткеп, эрттирер оргкомитет хуралынга киришкен

Шуулганны 2019 чылдың март 28-30 хүннеринде эрттирерин оргкомитет бадылаан деп, РФ-тиң Чазааның албан езузунуң сайтызы дыңнаткан. Красноярскиниң экономиктиг шуулганын эрттирер чер кылдыр «Сибирь» бүгү-делегей делгелге-ажыл төвү биле Сибирьниң федералдыг университедин шилип алган. 

Оргкомитеттиң хуралында, шуулганның ажыл-агыйжы программа төлевилелиниң өзээ болур «Енисейжи Сибирь» инвестиция төлевилелинде киржип турар компаниялар-биле кады российжи экономиканың чижилге темазын сайгарган. Дмитрий Козак федералдыг социал-экономиктиг хүн чурумунда ужур-уткалыг темаларны сайгарып тура, Красноярскиниң экономиктиг шуулганының чугулазын демдеглээн. Сибирь регионнарының ажыл-агыйжы календарында чижилгени тургускан өзек болуушкуннуг российжи саммит кылдыр КЭФ-2019-ты планнаан.  

Регионнар аразының «Сибирь дугуржулгазы» ассоциациязының даргазы болур Шолбан Кара-оол инфраструктура төлевилелдериниң, Тываның девискээринде база, моон соңгааргы хөгжүлдезиниң айтырыын КЭФ-ке көдүрер. Ол «Енисейжи Сибирьни» тургузуп турар шупту үш регионнуң чижилгезин улгаттырарынга, тыва төлевилелдерниң курлавыры улуг деп, санап турар. 

«Тыва таварты Азияже орук – кызыгаарның тыва участогунда каайлы хосталгазын чедип алырынга, Моол база Кыдатче энергетика, транспорт база өске-даа коридорларны тургузарынга кожа сибирьжилерден деткимче улуг болур болза, ооң боттаны бээри бөгүнде билдингир» - деп, республика баштыңы социал четкилерде бодунуң бижидип алыкчылары-биле бодалын үлешкен. 

Красноярск шуулганының программазын чедир ажылдап кылгаш, декабрь 14-те оргкомитеттиң дараазында хуралында бадыладыр. Козактың удуртуп эрттиргени ол хуралга, Шолбан Кара-оолдан аңгыда, эртем болгаш дээди өөредилге сайыды Михаил Котюков, Красноярск крайның губернатору Александр Усс, федеральных яамылар болгаш ведомстволар төлээлери олурушкан.  

Москвага Тываның Баштыңы Шолбан Кара-оол Россияның ДОСААФ даргазы Александр Колмаков-биле чугааны чоруткан, Росссияның Кадык камгалал болгаш Культура яамыларының удуртулгазы-биле ужуражыры планнаттынган.