РФ-тиң чырыдыышкын сайыды биле Тываның Баштыңы өөредилге инфраструктуразын хөгжүдер айтырыгны чугаалашкан

"Ольга Юрьевна Васильева-биле ужурашкан санымда-ла, бисти камгалап турар ышкаш-тыр, деп бодалга кээр мен. Чугаалажып олура, шиитпирни кады дилээр дээш, аажок сагышсырып, чаа боттаныышкыннарывысты ала чайгаар деткип турары, илдең. Езулуг улуг Башкы! Ишкинге, Ак-Эрикке, Кызыл-Хаяга чаа школаларны, үш ээлчегге өөренмес кылдыр найысылалга, база солагай талакы дачаларга аңгы чаа школалар тудар аргазын чугаалажып көрдүвүс. Эгелеп алганывыс чаа уруглар садының тудуунга акша-хөреңги база чедшпейн турар. Аргаларны көрдүвүс…» - деп, Тываның Баштыңы ужуражылганың түңнелдерин бодунуң блогунда бижээн. 

2017 чылдың сентябрь 1-де Ольга Васильева Тывага кээп чораанын сагындыраал. Ол чорааш, Кызылдың президентиниң кадет училищезин, Ээрбек суурнуң ортумак школазын база өске-даа объектилерни кезээн. СФО-да президентиниң бүрүн эргелиг төлээзи Сергей Меняйло-биле кады "Спутник" микрорайонда 16 дугаар лицейниң байырлыг ажыдыышкынынга киришкен. Лицейни тударынга федералдыг бюджеттен 682,8 млн. рубльди база республика бюджединден 43,6 млн. рубльди үндүрген. "Ол чаа школалар эң сөөлгү үениң дериг-херекселдери-биле чепсегленген, келир үениң школалар-дыр. Бөгүн, мында, ындыг лицейни ажыдып тур бис» - деп, О.Ю. Васильева ынчан демдеглээн.  

Ольга Васильева РФ-тиң Өөредилге болгаш эртем яамызын удуртуп тургаш, Улуг-Хем кожууннуң ИйиТал суурда чаагайжыткан школа-интернат тудуунуң төлевилелин деткээнин, айтып каалы. Ону тударынга федералдыг бюджеттен 300 млн. рубльди үндүрген. Школага, 2018 чылдың сентябрь 1-де, «аграр угланыышкынныг республика лицеи» деп эрге-байдалды берген.