Тываның Баштыңы моол суможулар-биле Токиога чедип, япон сумонуң өзүп орар сылдызы – 19 харлыг тыва оол-биле ужурашкан

Шолбан Кара-оол Асашориниң (шын ады Долгорсурэнгийн Дагвадорж) саналын ажыглап, профессионал сумонуң удуртулгазы-биле ужуражып, эш-хуу харылзааны тутканын бодунуң блогунда тайылбырлаан. Республика Баштыңы чөөн чүк спортчу хевирлерниң шуптузун, япон сумону база, Тывага сайзырадыр изиг күзелдиг. Екодзун дээди аттыг Асашори-биле Тывадан элээди оолдарны бодунуң школазынга өөредип алырын дугурушкан. Асашориге өөренир спортчуларга, Японияда профессионал сумонуң делегейинче киреринге база төрээн республиказын алдаржыдарынга ол харылзаалар алызында дузалыг деп, Шолбан Кара-оол санап турар. 

Республика Баштыңы Токиога чорааш, профессионал сумо мөгезиниң карьеразын Японияда эгелеп чоруур баштайгы тыва оол-биле ужурашкан. Ол дээрге Тываның чурттакчызы, ачазы Моолда чурттап турар болгаш ол чурттуң хамааты апарган Амартувшин Амарсанаа-дыр. 2015 чылда Японияга келгеш, сумо школаларының бирээзинче кирип алган. Амарсанаа эрткен чылын, элээди оолдар аразынга сумога чемпионнааш, профессионал сумонуң өөредилге дивизионунче кирер эргени чаалап алган.

«Профессионал сумода бир буду-биле базып алган, бурунгаар улуг идегелди берген, сумода бистиң тыва мөгевис Амартувшин Амырсанаааны сеткилимден деткип тур мен. Ооң хары чаа-ла 19, узуну - бир метр сезен үш болза, чүс үжен беш кил аар деңзилиг. Кырган-ачазы Валерий Араптан - хүреш маргылдааларының чемпиону чораан. Амартувшинниң авазы Тывада чурттап турар, оглу-биле ужуражырын дилээн чүве. Ол эр-хей чоруп турар болду! Японияның чемпиону болган бирги тыва кижи ол-дур» - деп, республика Баштыңы бодунуң блогунда бижээн.