Тывага коллекционерлерниң болгаш хол-биле кылган ажылдар мастерлериниң III делегей фестивалы болуп эрткен

Россияның почта албанының Тывада салбырының эвээш санныг кылдыр үндүргени чаа почта открыткаларын таңмалаар езулал фестивальдың бир солун кезээ болган. Тывалар боттарының өгбези деп санаары алдарлыг полководчу, Чингисханның сурукчузу Субедейге тураскааткан открытка оларның бирээзи болур. Тыва чурукчу Евгения Медведеваның Тывада чурттаан, эрги шажын чүдүлгелиг орус чоннуң тоолчургу чугааларындан тоол чуртунуң дугайында «Беловодье» деп чуруун база хоолгалаан.

Республика Баштыңы Шолбан Кара-оол ук хемчегге киришкен. «Өлчей удазыны» тыва угулза хевирлиг, хол-биле базар почта таңмазын открыткаларга салгаш, Санкт-Петербургда А.С.Попов аттыг харылзааның төп музейинче дамчыткан.

 Фестивальдың экспозициязын Тываның Национал музейинде делгээн. Ында республика чурттакчыларындан аңгыда, Россияның регионнарындан, даштыкы чурттардан, ылаңгыя Конго Республикадан аалчыларның хуу коллекциялары кирген. Минералдардан, мөңгүнден коллекциялар, кара ыяштан африкан тураскаалчыгаштар база езулал дүрзүлери, фарфордан статуеткалар, ховар номнар болгаш значоктарны делгелгеде бараалгаткан. Екатеринбург хоорайдан аалчылар Михаил Сачёв биле Сергей Золотов Уралдың икона чуруур школазындан эрги шагның иконазын Тывага эккеп, сонуургаткан. Т

ыва Арат Республика үезинден бээр почта маркаларын сонуургап чоруур коллекционерлер – ооң эштериниң хууда саналы-биле фестиваль ужуун алганын Шолбан Кара-оол сагындырган. Төөгүлүг чүүлдерни чыып чоруур кижилер ортузунда нептереңгей апарган үш харлаан фестиваль, Тываның болгаш Сибирьниң турисчи календарында сонуурганчыг болуушкуннар санынче киирип болур эргени бо хүнде чедип алганын ол чугаалаан. Регионнарны чоокшулаштырып, кижилерге өөрүшкү-маңнайны сөңнеп чоруур бо фестивальды ам-даа деткиирин республика Баштыңы аазаан. 

Фестиваль үезинде эрткен «төгерик столда» Тываның Национал музейинге коллекционерлер клувун тургузар деп шиитпир үнген. Кулбтуң кежигүннери фестивальдар аразында чыглып, ажыл-чорудулгазынче ам-даа коллекционерлерни хаара тудуп, дараазында делгелгелерни кады белеткээр сорулгалыг.