Тываның орук-транспорт яамызы муниципалдар аразынга халдыр маршруттарга конкурсту чарлаан

Тывада кожууннар аразынга пассажирлер аргыштырылгазын чорудар дугайында үр хуусаалыг чөпшээрел алырынга мөөрей эгелээн. Республиканың орук-транспорт яамызы , бодунуң сайтызында, киржикчилерге конкурстуң негелделерин дыңнаткан.  

Тываның найысылалы биле кожуун төптериниң аразынга пассажирлер аргыштырылгазын ооң мурнунда түр үениң документилери-биле азы оозу шуут чок хандырып, экономиканың ол сектору «бодунуу»-биле хөгжүп турган. Республика Баштыңы Шолбан Кара-оолдуң даалгазы-биле, орук-транспорт болуушкуннарында озал-ондактың чылдагаанын тургузуп турар транспорттуг, ачы-дузазының шынары куду, «хирелиг» сөөртүкчүлерниң санын эвээжедип, ол адырга чурумну киирип эгелээн. 

Конкурс 5 угланыышкынга эрттерин яамы тодараткан. Ында Кызыл – Шагаан-Арыг, Кызыл – Хандагайты, Кызыл – Хову-Аксы, Кызыл – Туран, Кызыл – Бай-Хаак маршруттар бар. Комиссия пассажирлер сөөртүкчүлерин шилиирде дараазында чүүлдерни көөр: билдириишкин ээзиниң пасажирлер аргыштырар адырда арга-дуржулгазы, транспорт аймаан каш чыл ажыглааны, орук-транспорт озал-ондааның саны. Оон аңгыда автобустуң таарымчалыының база айыыл-чок чоруунуң дериглери – кондиционер, видеоплеер, видеорегистратор, автобус доктаамнары чарлаар электроннуг таблонуң барын кичээнгейге алыр. 

Конкурска тиилээн пассажирлер сөөртүкчүлери маршрутту хандырар эргени албышаан, боттарының ачы-дузазынга өртек-үнени айтып, спутниктен мониторинг дериг-херексели-биле автобузун дериирин болунга хүлээнир. Керээ негелдези езугаар шимчээшкинниң графигин болгаш расписаниезин шыңгыы сагып, пассажирлерни чоруур билеттер-биле хандырар. 

 Конкурстуң түңнелдери сентябрь 20 соонда билдинер.