10.08.2018
Тыва Республиканың Юстиция яамызының эрге-хоойлу экспертизазынга даянгаш, Тыва Республканың Чазааның доктаалы-биле, Культураның күрүне организацияларынга база чамдык профессионал уран, чогаадыкчы коллективтерге «Национал» атты тыпсыр чурум дугайында шиитпирни август 7-де, вторникте, хүлээп алган.
1995 чылдың апрель 3-те ат салган «Культура дугайында» Тыва Республиканың хоойлузунуң 52-ги чүүлү езугаар, «Национал» эрге-байдалды тыпсыр чурумну доктаадып, культура адырында онза күрүне болгаш хөй-ниити ужур-дузалыг ажыл-чорудулгалыг күрүнениң культура организацияларынга, чамдык профессионал уран, чогаадыкчы коллективтерге «Национал» атты тыпсырының негелделерин тодараткан.
Тыва Республиканың Чазааның доктаалында албан күүседир тодаргай негелделерни айыткан. Чижээ, организациялар болгаш коллективтер аңгы оран-савалыг болур ужурлуг.
Концерт организациялары база чамдык профессионал уран чогаадыкчы коллективтер чурт иштинге база даштыкыга чылда 90-тан эвээш эвес концерттерни көргүзер, а театрлар чаа тургускан шиилери-биле кады чылда 200-ден эвээш эвес шиини үндүрер.
Музейлер, библиотекалар база архивтер 25 чылдан эвээш эвес үеде турум болгаш шынарлыг ажылдап чоруур, профессионал ажыл-чорудулгазын, ажылдың шынарын бедидер дээш бодунуң ажылынга инновацияларны ажыглаар.
Музейлерде музей фондузунуң составында национал культура өнчүзү болур культураның үнелиг чүүлдери 10 хуудан эвээш эвес, библиотекаларда - библиотека фондузунуң составында национал культура өнчүзү болур ховар бижимел чүүлдер, эрги шагның номнары, документилер база үндүрүлгелер 10 хуудан эвээш эвес, архивтерде - архив фондузунуң составында документилерниң 10-дан эвээш эвес хуузу культура-төөгүге база эртемге үнелиг чүүлдер болур ужурлуг.
Оон аңгыда, организациялар болгаш коллективтер бүгү-делегей программаларынга болгаш төлевилелдеринге киржири албан деп доктаалда айыткан.
Республиканың күрүнениң культура организацияларының удуртукчулары «Национал» эрге-байдалды тыпсыр дугайында дилег бижикти Тыва Республиканың Культура яамызынче киирер. Дилег бижикке дараазында чүүлдерни кожар: организация азы коллектив ажылдакчыларының ниити хурал протоколундан ушта бижилге; Тываның культура азы уран чүүлүнүң хөгжүлде-сайзыралынга үлүг-хуузун киирген организация азы коллективтиң ажыл-чорудулгазының дугайында справка; регион болгаш федералдыг күрүне шаңналдарлыг ажылдакчыларның дугайында дыңнадыг; ажыл-чорудулгазының (ачы-хавыяазының) дугайында регионда, чуртта база даштыкыда МИЧ-терде парлаан 10-дан эвээш эвес материалдарның хоолгазы; республика база делегей чергелиг культурлуг хемчеглерге киришкен болгаш (азы) шаңналдыг черлер алганын бадыткаан документилерниң хоолгалары.
Эртип турар чылдың сентябрь 1-ге чедир төлээлеттинген органның адрезинче дилег билдириишкинни киирер, а төлээлеттирген орган сентябрь 15-ке чедир Тыва Республиканың Чазаанче саналдаар.
Дараазында Тыва Республиканың Чазаа хоойлужудулгада көрдүнген чурум-биле, «Национал» атты тыпсыр дугайында Тыва Республиканың Баштыңының Чарлыының төлевилелин Тыва Республиканың Баштыңының Администрациязынга сайгарып көөрү-биле киирер.
Тыва Республиканың Чазааның киирген дилээнге даянгаш, Тыва Республиканың Баштыңы «Национал» эрге-байдалды тыпсыр.