Тываның Баштыңы найысылалга автовокзал тудар саналдыг сайгарлыкчы-биле ужурашкаш, даалгаларны берген

«Бистиң чаңгыс чер-чурттугларывыстың аргыжып турары регионнар аразында база Моолдуң Улангомже пассажирлер сөөртүлгезиниң шынарын экижидер дээн саналды сонуургал-биле дыңнадым. Роман Добровольский чаа автовокзалды тудары эргежок чугула деп, ынаар боду акша-хөреңгини киириштиреринге беленин чугаалады. Хандырылганың стандарттарын экижидер дээн чүткүлдүг кижилерни деткиир апаар бис, ындыг санал-оналдыг бистиң сайгарлыкчыларывыс бары чүден эки-дир» - деп, Тываның Баштыңы блогунда бижээн.  

Айтырыгны сайгарып чугаалашкаш, Тываның Баштыңы Шолбан Кара-оол элээн каш даалгаларны берген, ылаңгыя Кызылдың мэриязынга күрүне-хуу кады эштежилге ажыл-чорудулгазы-биле «Кызыл хоорайның автовокзалы» объект тудуунче инвесторларны хаара тудар талазы-биле саналдарны киирерин айыткан. «Кызыл хоорайның автовокзалы» объектини тудар дугайында керээлиг дугуржулганы чарар эргеге ажык конкурсту эрттирериниң дугайында чогуур документини белеткээр.

Тыва Республиканың Экономика яамызы, Тыва Республиканың Саң-хөө яамызы, Тыва Республиканың Чер болгаш өнчү хамаарылгаларының яамызы, Тыва Республиканың Орук-транспорт комплекизиниң яамызы, Тыва Республиканың Чылыг болгаш энергетика яамызы, Тыва Республиканың Тудуг болгаш чуртталга-коммунал ажыл-агый яамызы, Тыва Республиканың Юстиция яамызы «Кызыл хоорайның автовокзалы» объектини тудар дугайында конкурсту эрттиреринге база керээлиг дугуржулганы чарарынга Кызыл хоорай мэриязынга дузаны көргүзер.

 Тыва Республиканың Информатизация болгаш харылзаа яамызы республиканың пассажирлер сөөртүлгезиниң талазы-биле диспетчер интернет-сервизин киирер айтырыгны өөренип, Кызылда таарымчалыг интернет-сервисти ажылдап кылгаш, ажыглалче киирерин хандырар. 

Бо даалгаларның күүселдезин хандырарын болгаш контрольдаарын Тыва Республиканың Чазааның Даргазының оралакчызы А.М. Чудаан-оолга дааскан.