Тываның эмчи колледжизиниң доозукчулары Сибирьниң медицина талазы-биле дээди өөредилге черлеринге өөредилгезин уламчылап болур

Дээди өөредилге черлериниң эрттирип турары химия, биология, орус дылга компьютерге тестированиени дужаагаш, Красноярскиниң, Сибирьниң база Алтайның күрүнениң медицина университеттеринде тускай сорулгалыг, бюджеттиг база коммерциялыг олуттарже кирип болур. «Өг-бүле бүрүзүнге бирден эвээш эвес дээди эртемниг уруг» төлевилел боттаныышкыны-биле, бо чылдың январьда, Кадык камгалал яамызы база колледжиниң удуртулгазы ол ажылды чоруткан. Дээди эмчи эртемин чедип алзын дээш колледжиниң доозукчуларын дужаадып киирер дугайында дугуржулганы ол дээди өөредилге черлери-биле чедип алганы ол.  

Алтайның күрүнениң медицина университеди өөредилгени 1 чылга кызырар талазы-биле тускай саналды кииргени солун. Колледжиниң доозукчулары чамдык эртемнерге база практикаларынга түңнелдерин эде дужаагаш, ийи дугаар курстан эгелеп өөренип болур. «Эмчи херээ», «Фармация», «Стоматология» мергежилдерге ынчаар өөренир арга бар. Өөренмишаан, мергежилиниң аайы-биле ажылдап база болур.  

Колледжтиң директору Саида Монгуш специалистиң бирги аккредитациязын доозукчулар ам эртерин чугаалаан. Эмчи колледжизинде ындыг хемчегни бир дугаар эрттирип турар. Ол тодаргай эмчи мергежилиниң талазы-биле эмчи ажыл-чорудулгазын чорударынга доозукчуларның дүгжүп турарын үнелээр.