«Созидатели Советской Тувы. Чтобы помнили…» деп номнуң таныштырылгазы болуп эрткен

 А.Б. Чыргал-оол аттыг Кызылдың уран чүүл колледжизинге Тываның Баштыңы Шолбан Кара-оол, Күрүне Думазының депутады Лариса Шойгу, республиканың хоочуннары, эртемденнер, чогаалчылар, төөгүчүлер, студентилер, школачыларның киржилгези-биле «Созидатели Советской Тувы. Чтобы помнили…» деп номнуң таныштырылгазы болуп эрткен. 

Кужугет Серээевич Шойгу аттыг культура фондузунуң база Лариса Кужугетовнаның бодунуң эчис-күзели-биле «Созидатели Советской Тувы. Чтобы помнили…» деп ном чырыкче үнген.  

«Республиканың шупту чурттакчыларынга, бирги ээлчегде номнуң маадырларының салгалдарынга эң-не үнелиг болгаш ховар белек, оларның дугайында улуг хүндүткел болгаш мөгейиг-биле бижээни онза. «Созидатели Советской Тувы. Чтобы помнили…» деп кайгамчык номнуң ужур-утказынга езулуг үнелелди ам кылып эгелээринге бүзүрээр мен. Шойгу аттыг фонд база Лариса Кужугетовна Төрээн черинге, ооң чонунга ынакшылы кандыг болурун ынчаар илереткен» - деп, Тываның Баштыңы Шолбан Кара-оол демдеглээн. 

Бо кайгамчык ном төрээн черинге ынакшылды быжыглап, бистиң республикавыстың, чурттуң совет үезинче эки хамаарылганы хевирлеп, төөгүнү, ону өөренип, кадагалап арттырарынче аныяктарны хаара тудар ужурлуг деп, республика баштыңы бодалын илереткен.  

Хертек Анчимаа-Тока, Бай-Кара Долчанмаа, Петр Астафьев, Маргарита база Юрий Ковенскийлер, Олег Гречищев, Сергей Кондинкин, Виктор Көк-оол дээш, республика төөгүзүнде аттары мөңгеде киир бижиттинген өске-даа алдар аттыг кижилерниң дугайында очерктерни сонуургал-биле номчуп болур.  

Номнуң тургузукчулары эң-не солун материалдарны беш эгеде чыып, архив шыгжамырындан ховар дээн фоточуруктарны ажыглаан. Номчукчуларга ол улуг белек. Бодунуң ук-салгалын сонуургаан Тываның чурттакчызы, сонуургалдыг школачы, тускай мергежилдиг специалист, бистиң республиканы чоок билип алыксаан Россияның чурттакчызы база даштыкы кижи ном-биле таныжып болур.  

Тываның гуманитарлыг болгаш тускай социал-экономиктиг шинчилелдер институдунуң ажылдакчылары бо онзагай номну кылырынга киришкен. Төөгү эртемнериниң кандидады Марианна Харуновага, культурологияның доктору Айлана Кужугетке, билдингир тыва журналист Наталья Богдановскаяга, ТИГПИ-ниң эртем библиотеказының библиотекары Чечена Норбуга база номнуң өске-даа авторларынга бистиң маадырларывыстың амыдыралчы төөгүзүнге камныг хамаарылгазы, номнуң онзагай дылы база кайгамчык каасталгазы дээш өөрүп четтириишкинни илереткен. 

Тываның Баштыңы Шолбан Кара-оол Тывага болгаш ооң хөй националдыг чонунга сөңнээн үнелеттинмес онза белээ, төрээн черинге ынакшылы, келир салгалдар дугайында сагыш човаашкыны дээш чаңгыс чер чурттугларының өмүнээзинден депутат Лариса Шойгуга өөрүп четтириишкинни илереткен.