Тываның уруглар поликлиникалары «Хумагалыг поликлиника» төлевилелге киржир

Тыва Республиканың Кадык камгалал яамызы кожууннарның эмнелге албан черлериниң, ылаңгыя уруглар поликлиникаларының ортузунга «Хумагалыг поликлиника» төлевилелди бо чылын база уламчылаарын шиитпирлээн. Эрткен чылын «Хумагалыг поликлиника» төлевилелге Кызыл хоорайның сес кол албан черлери киришкен. 

Россияның кадык камгалал сайыды Вероника Скворцова төлевилел күүселдезиниң үезинде уруглар поликлиникаларынче кичээнгейни углаарын айыткан. Төлевилелдиң координатору Эренмаа Алдын-оол эмнелге албан черлериниң кол эмчилеринге кол негелделерни болгаш чурумнарны тайылбырлаан. Эрткен неделяның төнчүзүнде Кадык камгалал яамызынга «Хумагалыг поликлиника» төлевилелди боттандырарының талазы-биле хурал болуп эрткен. 

Республиканың улуг болгаш бичии чурттакчыларга бирги эмчи дузазын көргүзүп турар 20 эмнелге организациялары төлевилелге бо чылын киржир. Электроннуг хүн чурумунга үндезилеп эмнелге организациязында регистратураның ажылын, эмчиниң хүлээп алыышкынын, чоннуң профилактиктиг хыналдазын, диспансеризациязын организастап, аарыг кижилерниң аай-дедир эмчилээрин таарыштырар. 5С технология-биле ажылды организастаар: аайлап, тускайлап, сайзыраңгайжыдып, чурумну сагып, арыг-силигни тургузары – эң кол. 

Республиканың консультация-диагностика поликлиниказы бо угланыышкында үлегерлиг эмнелге албан черинге санадыр. Поликлиниканың шупту кабинеттеринде ажылчын байдалды чаңгыс аайлаан, бир эвес эмчи азы эмчи сестразын солуп турар болза, кайда кандыг чүүл чыдары билдингир. База ол ышкаш анализтер алырын «чаңгыс көзенек» кылдыр чурумчуткан. 

Республиканың консультация-диагностика поликлиниказы эрткен чылын «Хумагалыг поликлиника» төлевилелдиң тиилекчизи болганын сагындыраал. Бо чылын төлевилелге киржирлер консультация-диагностика поликлиниказынга чедип, төлевилелди амыдыралга боттандырганының түңнелдерин херек кырында көрген. Ол поликлиниканы эмнелге организацияларынга тайылбырлыг болгаш практиктиг дуза көргүзер бирги эмчи-санитар дузаның регион төвү кылдыр эде тургускан. Специалистер «Хумагалыг поликлиника» төлевилелди боттандырарынга дузаны көргүзер.