Тываның найысылалында "Южная" белдир подстанцияны чаартып эгелээн

 Кызыл хоорайның улуг подстанцияларының бирээзинде чаартылга ажылдары эгелээнин Тываның Баштыңы Шолбан Кара-оол бодунуң блогунда дыңнаткан.  

 «Бистиң саналдаанывыс, РФ-тиң Чазааның бадылааны, 2025 чылга чедир Тываның хөгжүлде планында база бир пункт боттанып эгелээн! Кызылда хоорайның «Южная» 110/10 кВ белдир подстанцияның күчүзү 6,3 МВА турганындан, чаа трансформаторну салган соонда, 16 МВА чеде бээр. Эптээр ажылдар эгелээн, ону сентябрьда доозар ужурлуг. Кызылдың чөөн талазында чаа чедиги микрорайонну электри четкизинге кожар бис. Суворов биле Оюн Курседи кудумчуларның белдиринде подстанция найысылалдың барык чартык кезиин чырык-биле хандырыптар. Ам чырык хандырылгазы экижиир болгаш идегелдиг апаар» - деп, Тываның Баштыңы бижээн.

  "Южная" подстанция Кызылдың төп болгаш чөөн талада кезээн, Спутник микрорайонун база чоокку Каа-Хемни чырык-биле хандырар. Московская кудумчузунда "Городская" подстанцияга шак-ла ындыг чүък онаажыр. Үшкү подстанция - "Западная" найысылалдың оң талада кезээниң хөй чартыын харыылап турар. Удавас ол чарыкта "Вавилинская" подстанцияның тудуу база доостур. Аңаа РФ-тиң Камгалал яамызының объектилерин, ол чоок кавыда микрорайоннуң хереглекчилерин кожар.  

 2015-2025 чылдарда Тываның социал-экономиктиг хөгжүлдезинче угланган Россия Федерациязының Чазааның айтыышкынында аңгы пунктуже кирген болгаш, РФ-тиң Энергетика яамызының дужаалы-биле бадылаан "Тываэнерго" АН-ның информация программазы езугаар "Южная" подстанцияны эде чаартыр.