Сибирь федералдыг округда шериг үрер хөгжүм оркестрлериниң регионнар аразының I фестивалы Тывага эртер

 Тыва Республиканың Культура яамызы-биле 55-ки мотоадыгжы (дагжы) бригада кады фестивалды эрттирер.  

 Тыва эки турачы аъттыг эскадроннуг фронтуже аъттанган хүнүнге тураскаадып, республика Баштыңының чарлыы-биле тургускан Тыва Арат Респбуликаның эки турачыларынга алдар болдурган төөгүлүг сактыышкын хүнүнде – сентябрь 1-де шериг үрер хөгжүм оркестрлериниң регионнар аразының I фестивалы болур. 

 Сибирьниң шериг кезектериниң дөрт шериг оркестри: тускай сорулгалыг 24-кү аңгы бригада (Новосибирск), 35-ки аңгы гвардейжи мотоадыгжы бригада (Алтай крайның Алейск хоорай), 74-кү аңгы гвардейжи мотоадыгжы бригада (Кемерово облазының Юрга хоорай), 55-ки аңгы мотоадыгжы бригада (Кызыл) фестивальга киржир. Тыва Республиканың Чазааның Үрер хөгжүм оркестри – фестивальдың аалчылары. 

Чурттакчы чоннуң патриотчу кижизидилгезинче угланып, Сибирьниң аңгы-аңгы хоорайларының шериг оркестрлериниң оюн-көргүзүглерин кады эрттирерин чаңчыл болдурар дээш, делегейниң хөгжүм уран чүүлүнүң эң-не тергиин чогаалдарын нептередири-биле фестивальды эрттирер. 

Август 31-де фестивальга киржир оркестрлер чедип келгеш, кады күүседир аялгаларын белеткээр. Шериг оркестрлер Кызылда Тыва эки турачыларның тураскаалынга боодал чечектерни база салыр. Ооң соонда фестивальдың киржикчилериниң чыскаалы эгелээр. Чыскаал соонда «Азия төвү» скульптура комплекизинге фестивальды ажыдып, шериг оркестрлерниң оюн көргүзүүнче кирер.