Тывада хөй квартиралыг бажыңнарның капитал септелгезин кылырынга оочурну тодарадыр арганы тургускан

 Тыва Республиканың Чазаа капитал септелге чорудар бажыңнарның оочурун тургузарының чаа чурумун бадылаан. Ол талазы-биле доктаалга ат салган Чазак Даргазының бирги оралакчызы Органа Натсактың чугаалап турары-биле алырга, доктаалды РФ-тиң Чуртталга кодекизинге болгаш республиканың «Хөй квартиралыг бажыңнарда ниити өнчү-хөреңгиниң капитал септелгезин организастаарының дугайында» хоойлузунга дүүштүр ажылдап кылган.

 Ол документини белеткеп кылган Тудуг яамызының специалистери капитал септелгеге кирер бажыңнарның оочурун беш параметр езугаар доктаадып тургузар. Оларның бирээзин баллдар-биле үнелээр. Балл хөй болган тудум бажыңның септелгеге кирер оочуру чоок болур. Маңаа эң кол барымдаа — бажыңны ажыглалга киирген чылы. Чижээ, 1965 чылга чедир туттунган бажыңга 10 балл тыпсыр, 1965-тен 1974 чылга чедир туттунганнары — 8 балл, 1975-тен 1984 чылга чедир — 4 балл, 1985 чылдан бо үеге чедир — 2 балл.  

 Сөөлгү катап кажан капитал септелге кылганын база барымдаалаар. Сөөлгү катап 2003 чылда септээн бажыңнарны онза кичээнгейге алыр. 

 Ол ышкаш дадывырларның кирип турары, бажыңнарның эргижирээни, чуттакчыларның амы-тынынга болгаш кадыкшылынга айыыл тургузуп болуру база оочурну бурунгаарладырынга барымдаа болур.  

 Оларны барымдаалап капитал септелгеже оочурну хевирлээр. Бир эвес түңнел саннары деңнежи бээр болза, баштайгы квартираны хуужуткан үени көөр, азы капитал септелгениң регион программазын бадылап турган үезин барымдаалаар.