Тывада онза байдалдар чурумун киирген

 Сибирь федералдыг округтуң девискээринде тургустунган байдалдар уржуундан регионнар аразының онза байдалын чарлаан болгаш, Тывада база ОБ чурумун киирген. Республика Баштыңы Шолбан Кара-оол ол дугайында айтыышкынга атты салган.  

 Апрель 24-тен регион девискээринде өртке удур онза чурум чоруп турарын сагындыраал. Онза байдалды болдурбас база чайладыр территориалдыг система иштинде күштер база удуртуп-башкарар органнар күштелдирген чурумче шилчээн.

 Арга-арыгда өртке удур чаагайжыдылга ажылдарын кылып турар кижилерден аңгыда, хамаатыларның транспорт аймаа-биле арга-арыгже кирери; арга-арыгга база көдээ ажыл-агыйга ажыглаар шөлдеринге одаг кыпсыры, кургаг сиген, бок өрттедири хоруглуг.

Онза байдал чурумун күштелдиргени-биле шупту оперативтиг медээлерни онза хыналдага алган, хондур-хүнзедир дежурныйлаашкынны тургускан, айыыл чок чоруктуң хемчеглерин күштелдиргенин ТР-ниң Арга-арыг талазы-биле күрүне комитеди дыңнаткан. Тываның Баштыңының даалгазы-биле кол черлерде арга-арыг постуларын организастаан. Май 4-түң хүнү-биле алырга, Тываның девискээринде өрт чок.

 Муниципалитеттер удуртукчуларынга боттарының девискээринде ОБ болдурбас болгаш чайладыр хемчеглер планын күүседир, материалдыг курлавырларны белеткээр, ОБ бооп болурунуң айыылының дугайында ТР-ниң Онза байдалдарны болдурбас база чайладыр талазы-биле территориалдыг системада күштерниң база удуртуп-башкарарының органнарынче бээр медээлерни доктаамал чыып, дамчыдарын организастаар, массалыг информация чепчектери дамчыштыр чурттакчы чонга агаар-бойдустан үнген өрттерниң оперативтиг байдалының дугайында дыңнадыр ажылдарны идепкейжидерин сүмелээн.

 Тус черниң эрге-чагыргазы ОБ үезинде чонга дыңнадыгны бээр талазы-биле хондур-хүнзедир дежурствону организастаар, аъш-чем, эм-таң болгаш бирги хереглелдиң өске-даа чүүлдери-биле бүрүн хандыртынган чурттакчы чонну чыттырар түр үениң пунктуларын белеткээр.  

 Тыва Республиканың Хамааты камгалал болгаш онза байдалдар албаны, Россияның ОБЯ-ның ТР-де КЭ база Тываның Арга-арыг талазы-биле күрүне комитеди чурттакчы чонну арга-арыгже кирбезин, одаг кывыспайн, кургаг сиген болгаш бок өрттетпезин кыйгырып тур. Тыва Республиканың ХК база ОБ албаны онза байдалдар дугайында «101», «112» азы 8 (39422) 3-16-16 «изиг шумуг» телефонунче дыңнадырын сагындырды.