Тываның Чазаа дөрт школа тудуунуң төлевилелин бадылаан
11.04.2017
Тываның эрге-чагыргазы найысылалдың солагай талакы дачалар кезээнге база «6а» микрорайонунга, база ол ышкаш Тес-Хемниң Ак-Эрик биле Мөңгүн-Тайганың Кызыл-Хая суурунга чаа школаларны тударынга белеткенип эгелээн.
Тываның Баштыңы Шолбан Кара-оол ол объектилерниң төлевилелинге атты салган. Ону кылырда чаңгыс аай төлевилел документациязының реестринде кирген белен архитектура шиитпирлерин ажыглаар. Тудугнуң чарыгдалдарын болгаш хуусаазын эвээжедиринге ол идиглиг.
ТР-ниң өөредилге болгаш эртем сайыды Татьяна Санчаа, «Геопрофи» эртем-бүдүрүлгезиниң ооң мурнунда ажылдап кылганы Бай-Хаакская кудумчуда школаның төлевилелин солагай талакы дачалар школазының тудуунга ажыглаарын чугаалаан. Класс бүрүзүнге 25 өөреникчи өөренир, 825 олуттуг, үш каът школа. Узуну 15, дооразы 24 метр, бедии 6,2 метр хемчээлдиг 2 спорт зал, 298 олуттуг улуг зал, 272 кижиге столовая, библиотека, терапевт, стоматолог база психолог кабинеттерлиг медпункт, ажыл-агыйжы өске-даа өрээлдер төлевилелде кирген.
«6а» микрорайонунга база-ла ындыг школаны тудар. Төлевилел кылыкчылары белен дөзевилелдерни катап ажыглаарда, ону чүгле турар черинге ону таарыштырар апаар. Тудугнуң төнчү үнези оон хамааржыр.
«Тувагражданпроект» ААН-ның Ийи-Талда 176 кижиге школазының төлевилели күрүне экспертизазының эки үнелелин алган, ынчангаш яамы Ак-Эрик биле Кызыл-Хаяга спорт залдыг, чаңгыс каът, ындыг школа тудуун шилип алган. Баш бурунгаар санаашкыннар-биле алырга, көдээ школа тудуунга-ла – 345 млн. хире рубль херек.
Возврат к списку
|