Тывага тудар чаа спорт-культура төвүн Күрүне Думазы деткээн

Найысылал Кызылдың чоогунда Каа-Хем суурга тудуу бо чылдың чайынында эгелээр улуг спорт-культура төвүнге 787,6 миллион рубльди үндүрүп бээр дугайында шиитпирни Россия Федерациязының Күрүне Думазы хүлээп алган. Ол дугайында Республиканың Баштыңы Шолбан Кара-оол бодунуң блогунга дыңнаткан.

2011 чылдың төнчүзүнде Россияның Президентизи Владимир Путин бистиң республикага албан-ажыл аайы-биле чорааш, Тывага улуг спорт-культура комплекизин тудар дугайында саналды деткээн. Ооң деткиишкини бо улуг тудугну тударынга хамаарыштыр дугуржулганы федералдыг органнарның аңгы-аңгы деңнелдеринге чедип алырынга кончуг дузалыг болган.

Узуну 100, дооразы 60 метр, ниити шөлү 6 муң дөрбелчин метр, чер иштинде бир каът, чер кырында ийи каът, ниитизи-биле үш каът спорт-культура комплекизинге 7 муң көрүкчү кирер кедергей улуг спорт-культура ареназы турар. Аңаа хөй киржикчилиг янзы-бүрү спортчу маргылдааларны, концерттерни-даа эрттирип болур. Төптүң адаккы каъдынга ча адар 76 метр узун дурттуг тир турар.

Тыва биле Россияның чаңгыс демнежилгезиниң 100 чылынга уткуштур комплексти тудуп доозар. Бо улуг юбилейниң чугула болуушкуннарын чаа спорт-культура төвүнге эрттирер деп республиканың культура болгаш спорт ажылдакчылары идегеп турар.

Тывага 10 биче-стадионнарны бээрин, 5 спортчу объектилерни тударынга деткимчени көргүзерин Россияның спорт сайыды Виталий Мутко Шолбан Кара-оол-биле чоокта чаа ужуражыышкын үезинде база катап бадыткаан. Бир эвес ол аксы-сөзүн ээлептер болза, Бай-Хаакка,Чадаанага, Сарыг-Сепке, Тээлиге (кылымал футбол шөлдүг) стадионнарны, Ак-Довуракка эштир бассейнни тудар.