Тываның бюджединиң орулгазы ажык-кончаа үндүрүүнден 139 хуу көвүдээн

 Тыва 2016 чылда бодунуң орулгаларының түңүн, 2015 чылдың түңнелинге деңнээрге, 17 хуу азы 622,1 млн. рубльге көвүдеткен. Республиканың бодунуң орулгаларының ниити хемчээли 4 млрд. 324,1 млн. рубль болган. ТР-ниң Саң-хөө яамызында республика бюджединче үндүрүгден база үндүрүгден эвес орулгалар киирилдезиниң түңүн үндүрген.

 Орулга талазы-биле план 102,6 хуу күүсеттингенин яамының специалистери демдеглээн. Организацияларның эт-хөреңгиге үндүрүүнден аңгыда (чыл планын күүседиринге чедир чүгле 0, 3 хуу четпээн), шупту орулгалар дөстеринге өзүлде болган. 

 Организацияларның ажык-кончаа үндүрүү элээн өзүлделиг болганын демдеглээн, 2016 чылда ол 139 хуу четкен. Улуг үндүрүг төлекчилериниң аванс төлевирлери, оон аңгыда үндүрүгден эртир төлээн түңге банк адырында эгидилге чогу ону хандырган деп, ТР-ниң Саң-хөө яамызы дыңнаткан. 

 Ажыктыг казымал байлактар тывыжындан үндүрүглер 2015 чылдың деңнелинден 41 хуу хөй болган. Нефть продуктуларынга акцизтер (+22%) база хуу кижилерниң орулгаларындан үндүрүг (+5%) өзүлделиг. 

 Хуу кижилерден орулга үндүрүү мурнуку черни ээлеп турар – киирилделерниң ниити хемчээлиниң 51 хуузу. Ийиги черде акцизтер - 17 хуу. 2016 чылда кирген орулгаларда ажык-кончаага үндүрүгнүң үлүү 9 хуу, эт-хөреңгиге үндүрүг – 8 хуу, ажыктыг казымал байлактар тывыжындан үндүрүг – 5 хуу болган.