Баш бурунгаар дыңнадыглар-биле алырга, Тываның территориязында дүшкен космиктиг корабльдиң бузундуларындан когарааннар чок

 Декабрь 1-де, тус чернии-биле 23.30 шакта, Россияның ОБЯ-ның Тыва Республика талазы-биле Кол эргелелиниң кризистиг байдалдарда башкарылга төвүнче, штаттан дашкаар байдал ужун, Тыва Республиканың чедери берге, улус чок, даглыг территориязының кырынга, 190 хире км бедикке, чүък сөөртүр «Прогресс МС-04» транспорт корабли читкен дугайында дыңнадыг келген. 

 Байдалды тодарадырынга республиканың шупту кожууннары-биле кады ажылдажылганы организастап, өртчүлер кезээниң оперативтиг бөлүүн чоруткан. Амгы үеде ук байдалга мониторингини дежурныйларның ээлчээ кылып, көрген, билген кижилерден медээлерни чыып турар. Когараан кижилер дугайында дыңнадыг кирбээнин, ОБЯ-ның Тыва Республика талазы-биле Кол эргелели дыңнаткан.  

 Тываның Баштыңы Шолбан Кара-оол Роскосмостан болуушкуннуң дугайында албан езузунуң бадыткалын алгаш, космиктиг чүъктүң будундулары дүшкениниң уржуктарының дугайында медээни хынаарын онааган.

  «Тываның территориязында «Прогресс» космиктиг корабльдиг будундулары дүшкен дугайында медээ чамдык чаңгыс чер-чурттугларывысты дүвүреткен. Сүт-Хөл биле Чөөн-Хемчик кожууннарның чурттакчылары 22 шак үезинде дыңзыг дааштыг, дыка чырык чырыкты көрген бооп турар. Корабль чазылган, ынчалза-даа ооң бузундулары агаарга хып каан деп, Роскосмос бадыткап турар. Ол болуушкун биске багай уржуктар чедирбес боор деп идегеп, муниципалдыг тургузуглар боттарының территорияларында байдалды хынап, бирги ээлчегде малчын турлагларда тайбың бе дээрзин көөр ужурлуг» - деп, Тываның Баштыңы бодунуң блогунда бижээн.