Тывада арга-арыг өрттерин өжүрүп тургаш мөчээн арга-арыг даамылдарынга база авиа-арга-арыг камгалалының дайынчыларынга сактыышкын езулалын эрттирген

 Дөрт чыл бурунгаар, июнь 6-да, Кара-Хөл хөлдүң чоогунда чедери берге тайгада өрттү өжүрүп тургаш мөчээн 8 дайынчыга сактыышкынны кылыры-биле, ТР-ниң Арга-арыг комитеди, дайынчыларның болгаш арга-арыг даамылдарының кады ажылдап чораан эш-өөрү, маадырларның чоок кижилери чыылган. «Авиа-арга-арыг камгалалы» КУБ-туң девискээринде туткан тураскаалда Николай Былев, Владимир Кечил-оол, Херел Кызыл-оол, Николай Новиков, Виктор Стремоусов, Сергей Федотов, Радион Хуурак, Андрей Шилин оларның аттарын мөңгежидип бижээн. 

 Республика девискээринге, оон өске-даа чылдарда, арга-арыг өрттерин өжүреринге киржип тургаш мөчээн маадырларны ол хүн база база сагынган. Тураскаалда сиилбээн маадырларның даңзызында кижилерни саны - 16. Оларның аразында Туранның арга-арыг ажыл-агыйының лесниктери Сергей Асланов, Геннадий Белек-оол, Виктор Кожухов, Александр Савин, Иван Семонов, Юрий Сыйдан-оол, Владимир Чудояков 1996 чылдың май 21-де өрттенген тайганы камгалаар дээш амы-тынын безин харамнанмаан. База ол ышкаш 2012 чылдың май 16-да арга-арыынга өрттү өжүрүп тургаш мөчээн Элегестен эки турачы Борис Оюннуң ады база даңзыда бар.