Тываның Баштыңы журналистиканың хоочуну Дайынчы Тюлюшевич Дамба-Хуурактың мөчээни-биле төрел болгаш чоок кижилеринге кажыыдалын илереткен

 Үр эвес аараанының соонда, март 28-те, тыва журналистиканың хоочуну Дайынчы Тюлюшевич ДАМБА-ХУУРАК амыдыралдан чарлып чоруткан. 

 Ол 1942 чылдың январь 17-де Чаа-Хөл кожууннуң Ак-Туруг суурундан ырак эвесте Аргалыктыг деп черге төрүттүнген. Кызылдың башкы институдун дооскан соонда Дайынчы Тюлюшевич дыка хөй чылдарның дургузунда Эрзин, Чаа-Хөл, Сүт-Хөл кожууннарның школаларынга башкылап, өөредилге эргелекчилеп, директорлар чораан. Ооң дыка хөй өөреникчилери төлептиг кижилер болганнар, олар эки үлегер-чижек көргүзүп чораан башкызын чылыы-биле сактып чоруурлар. 

 Амыдыралының сөөлгү он чылдарын Дайынчы Тюлюшевич журналистикага бараан болдуруп келген, ооң бижээн чүүлдериниң кол маадырлары — көдээ черниң чурттакчылары, кол темазы — көдээ черниң ажыл-амыдыралы болуп келген. Беш чыл дургузунда «Шын» солуннуң Тес-Хем болгаш Эрзин кожууннарынга тускай корреспондентизинге ажылдаан. 2001 чылдан эгелээш, 15 чыл дургузунда, амыдыралдан чарлып чоруурунга чедир Тес-Хем кожуунда үнүп турар «Самагалдай» солунну редакторлаан. Ол идепкейлиг болгаш ажыл-ишчи редакторларның бирээзи болбушаан, бодунуң билиин доктаамал бедидип, ону амыдыралга ажыглап чораан. 

 2012 чылда ол Тыва Республиканың Чазааның Даргазының Хүндүлел бижии-биле шаңнаткан. 2014 чылда Тываның болгаш Россияның демнежилгезиниң 100 чылынга алдар болдурган тураскаал медальды аңаа тывыскан. 

 Дайынчы Тюлюшевич Дамба-Хуурак-биле чарлыышкынның езулалы март 30-де 14.00 шакта Тес-Хем кожууннуң Самагалдай суурнуң Чындыгыр кудумчузу, 10, квартира № 1-ге болур.

 Тываның Баштыңы Шолбан Кара-оол Дайынчы Тюлюшевич Дамба-Хуурактың төрел болгаш чоок кижилеринге, ол ышкаш бодунуң бирги дузалакчызы Орлан Дайынчыевич Дамба-Хууракка ачазының мөчээни-биле холбаштыр ханы кажыыдалын илередип тур.