2016 чылда Тываның эрге-чагыргазы эгелеп чоруур 47 араттарны деткиир

 Эгелеп чоруур араттарны деткииринге 60 млн. ажыг рубль түңнүг федералдыг субсидияны Тыва 2016 чылда алыр. Ооң дугайында айтыышкынга чурттуң чазааның даргазы Дмитрий Медведев март 1-де атты салган. 

 «Эгелеп чоруур арат» программаны боттандырарынга республика боду 10 млн. рубльди кады акшаландырарынга белен. Көдээ ажыл-агый болгаш аъш-чем яамызының специалистериниң санаашкыны-биле алырга, федералдыг болгаш республикадан субсидия акшазы 47 тараачын-арат ажыл-агыйларны тургузарынга чедер ужурлуг. 

 2012 чылдан бээр, Тывада, аныяк араттарны деткиир программа ажылдап турарын сагындыраал. Бо үениң дургузунда 150 хире өг-бүлелер ол программаның киржикчилери болуп, көдээ ажыл-агый техниказы, уксаалыг мал, кажаа-хораа тудуп алырынга, хөй дизе-ле 1,5 млн. рубль чедир түңнүг грант акшаларын алыр аргалыг болган. 

  Хөй-ниити төлээлери, сайгарлыкчылар, көдээ ажыл-агыйының специалистери кирген республика чазааның чанында тускай комиссия программаның чаа киржикчилерин илередир. Төлевилел түңүнүң 10 хуузундан эвээш эвес бодунуң хөреңгизин, ферманың хөгжүлдезинче киирип шыдаар, шыырак ажыл-агыйларны онза кичээнгейге ап, субсидия тыпсырынга магадылалды бээр. База ол ышкаш тараачын-фермер ажыл-агыйы эрге-байдалче шилчииринге белен, «быжыг бут кырында» хууда дузалал ажыл-агыйлары бирги ээлчегде ап болур.