Тывада «Чылдың башкызы-2016» мөөрейниң муниципалдыг үе-чадазы эгелээн

 Башкыларның ортузунда профессионал мергежилдиң «Чылдың башкызы—2016» конкурузунуң муниципалдыг үе-чадазының байырлыг ажыдыышкыны февраль 25-те болган.

 «Чылдың башкызы» ат дээш Кызыл хоорайдан алды башкы мөөрейлежир. Олар дээрге, Оюу Ооржак – 4 дугаар школаның төөгү башкызы, Чодураа Аякпан – 8 дугаар школаның эге класс башкызы, Руфина Санданчик – 3 дугаар школаның орус дыл болгаш литература башкызы, Солбак Тивии – 4 дугаар школаның эге класс башкызы, Мария Слащева – 14 дугаар школаның англи дыл башкызы, Алена Сарыглар – 2 дугаар школаның эге класс башкызы. 

 Мөөрейниң баштайгы үе-чадазы «Методиктиг ажылдар» деп ээлчегден эгелээн. Киржикчилерниң интернет-курлавырларын жюри өөренип көре берген. Методиктиг сүмелер кирген сайт болгаш «Мен — башкы мен» деп ажыл үнелелди алыр. Авторнуң сорулгазы — башкы мергежилди канчап шилип алганын дыңнадыры, бодунуң педагогтуг ажылын көргүзери, өөредилге чорударының аргаларын болгаш амгы делегейде башкы кижиниң хүлээлгезин канчаар билип турарын таныштырары. 

 Ол ээлчегниң түңнелдери февраль 29-та билдинер. Ооң аңгыда «Аныяк специалист», «Эртемниң эң эки эр башкызы», «Эң эки кижизидикчи эр башкы» деп номинациялар база бар.

 Чогаадыкчы мөөрей март 4-ке чедир уламчылаар.