Чаа-Хөлде 30 чыл манааны тудуг – чаа культура-спорт комплекизи ажыттынган

 Чаа-Хөл суурга чаа Культура бажыңының ажыдыышкынын чон 30 хире чыл манап келген. 70 чылдарда эрги суур Саян-Шушенск суг шыгжамырының адаанга баар деп баарга, ону чаа черже көжүрген турган. Ынчан чаа клуб тудуун планнаан-даа болза, 1989 чылда ССРЭ дүжерге, ол тудуг ара турупкан. Ону катап эгелээрин каш катап семезе-даа, база-ла акша айтырыынга үскеш, ара турган. 

 Чүгле 2013 чылда ол айтырыгны шиитпирлээр арга тургустунган. Регионнуң Баштыңы Шолбан Кара-оол кожууннуң чурттакчыларының чагыын күүседип, Чаа-Хөлге Культура бажыңын тудуп доозар деп ыяк шиитпирни үндүрген. 

 Комплекстиг тудугну инвестиция төлевилелдериниң кады акшаладырыышкыны-биле республика фондузунуң акша-хөреңгизи-биле чоруткан. Объектиниң тудуг ажылдарының смета езугаар үнези 72 914,6 муң рубль (эрги конструкцияны бусканы-биле). 

 Тудугну «Еврострой» КХН организация туткан. Ам чаа-хөлчүлерниң үрде манааны белээ – кожуун төвүнде культура-спорт комплекизи ажыттынганы бо. 

 Республиканың Баштыңы Шолбан Кара-оол: «Бергедээшкиннер турза-даа, социал объектилерже дыка хөй акша курлавырларын киирип турар бис. Чаа-Хөлде Культура бажыңы, Бай-Хаакта Спорт ордузу ажыттынган, Хөндергей биле Дөң-Терезин суурларда клубтарны чайга чедир доозар, а Сарыг-Септе Спорт ордузунда ажылдар адакталган. Шупту бо социал албан черлери чонунга ажыктыг ажылдап, эки чүүлдерни эккээр ужурлуг. Келир салгал эртем-билиглиг, культурлуг кижилер болзун дээш, культура бажыңнарын болгаш спорт ордуларын тудуп турарывыс ол" - деп чугаалаан. 

 Даштын соок дыңзыг болза-даа, культура-спорт комплекизиниң байырлыг ажыдыышкынынга суурнуң чону шупту чыглып келген. Ындыг байырлалдарның кол кезээ – атлас кожааны кезер езулалга Тываның Баштыңы Шолбан Кара-оол, Дээди Хуралдың даргазы Кан-оол Даваа, Чаа-Хөл суму чагыргазының баштыңы Станислав Сарбакай киришкен. 

Тывада Хүндүлээчел езу-чаңчылдың чылы база ыдык Шагаа байырлалының бүдүүзүнде чаа Культура одааның ажыттынганы – улуг өөрүшкү. Шолбан Кара-оол Чаа-Хөл кожууннуң хоочуннары, хүндүлүг хамаатылар – малчын Адыя Чатпак, маадыр ие Менниш Сурун-Лама, Тываның алдарлыг малчыны Александра Суур-оол, Тываның алдарлыг эмчизи Павел Суван болгаш өскелер-биле чолукшулга езулалын кылган. 

Алдынай Дирти, Чаа-Хөл суурда Культура бажыңының директору: «Клувувус ажыттынмаанда-ла кижилер кээп, эргий кезип, сонуургап турдулар. Оларның четтикпейн турары, черле чөп. 250 олуттуг көрүкчүлер залы, аңгы спорт залы, солуттунар чер, тренерлерге, артистерге өрээлдер дээш, таарымчалыг байдалдар тургустунган. Улуг, делгем холл база бар. Ам шиилер, концерттер тургузуп, Тывада билдингир коллективтерни чалап болур бис. Оон аңгыда янзы-бүрү конкурстар, оюннар, маргылдааларны эрттирип, аңгы-аңгы угланыышкынныг чогаадыкчы болгаш спортчу бөлгүмнер ажыттынар».

 Алексей Ховалыг, чурукчу: «Ооң мурнунда мындыг арга чок турган болгаш, Культура бажыңының бирги ажыл хүнүнде-ле чуруктар болгаш чонар-даштан кылыглар делгелгезин чонга бараалгаттывыс. Ам ындыг хевирлиг делгелгелерни доктаамал эрттирип, чырыдыышкын ажылын чорудар бис. Культура одаа деп чүве ынчан көстүп кээр».