Тываның Баштыңы Шолбан Кара-оол хостуг хүреш мөгези Начын Кууларга чурттаар оран-сава сертификадын тывыскан

 Республика Баштыңы Шолбан Кара-оол 2015 чылдың спортчу тергиидекчилериниң кол өзээн тургускан 9 спортчуга шаңналдарны болгаш хүндүлүг аттарны тывыскан.

  Самет Чимбиян - бүгү-российжи категорияның судьязы, Алексей Ондар – спортчу уг-шиг тыварының спорт мастери, Буян Бурбучук – сумога делегей класстыг спорт мастери, Мерген Санаа биле Эчис Сарыгларга –комплекстиг хүрештерниң делегей класстыг спорт мастерлери, Сергек Ооржакка – Россияның алдарлыг спорт мастери, мөге Айдамир Монгушка –Арзылаң аттарга төлептиг болган.

 Ол кежээ «Тыва Республиканың алдарлыг ажылдакчызы» хүндүлүг аттарны сумонуң кол тренери Адар Куулар биле спорттуң хоочуну Галина Хопровага хөйнүң адыш часкаашкыны-биле үдетпишаан, тывыскан. 

 Хостуг хүрештиң мөгези Начын Кууларга чурттаар оран-сава садып алыр сертификатты тутсуп, улуг деткимчени берген. Спортта көскү чедиишкиннери болгаш амыдыралдыг кадык овур-хевирин суртаалдап чорууру дээш ындыг сертификатты ооң мурнунда Опан Сатка берген турган.