«Кремль» рейтингизинде Тываның Баштыңы 85 губернаторларның аразындан 37-ги черни быжыы-биле ээлээн

 РФ-тиң Президент Администрациязының Иштики политика эргелелиниң удуртукчузу турган Константин Костинниң удуртканы Хамааты ниитилел хөгжүлдезиниң фондузу 2015 чылдың сөөлгү - 11 дугаар рейтингизин чырыкче парлап үндүрген. Хамааты ниитилел хөгжүлдезиниң фондузунуң эксперттериниң бодалы-биле алырга, бо рейтингиде регионнар баштыңнарының ажыл-чорудулгазынга үнелелдиң кол көргүзүүнге кризистиң салдарын таарыштыр эртип билирин киирген. "Кризистиң кудуку деңнелин эрттивис, ам нарын бергедээшкиннер болбас деп, президент чугаалаан. Маңаа регион эрге-чагыргаларының кризиске удур хемчеглерни боттандырарындан хамааржыр» - деп, К. Костин тайылбырлаан. 

 Хамааты ниитилел хөгжүлдезиниң фондузунуң демдээзи-биле алырга, кризистиң уржуу база бизнесте чиновниктерниң киржилгези-биле холбашкан чөрүлдээлер ужун, РФ-тиң регион баштыңнарының барык чартыының туруштары элээн шимчей берген. А Шолбан Кара-оол эрткен айларда ышкаш, бедик рейтингилиг губернаторлар бөлүүнде туружун хевээр арттырган. Ында регионнарның 28 баштыңнары бар. Сибирь федералдыг округда Тываның Баштыңының рейтингизи эң бедик. Кемерово облазының губернатору Аман Тулеевтиң чүгле бичии-ле соонда, ынчангаш фондунуң аналитиктери эң-не бедик көргүзүглүг лидерлер бөлүүнде ону киирген. 

  Рейтингини түңнээриниң медотиказы тематиктиг беш модульдан тургустунган. Бирги (баазалыг) модуль «Хөй-ниитиниң бодалы» фондунуң социологтуг шинчилелдерин болгаш эксперттерниң демдектерин каттыштырган. РФ-тиң күрүне статистиказының федералдыг албанының көргүзүглеринден ийиги модуль тургустунган. Үшкү модуль Россияның регионнарының социал байдалының көргүзүглери-биле үнелеттинген. РФ-тиң субъектилеринде экономиктиг байдалга демдек-биле дөрткү модульду үндезилээн. Бешки модуль регион баштыңнарының медиа-көргүзүг ажыл-чорудулгазын сайгарган.