Тыва аныяктарның аразынга улусчу ужур-чаңчылдарның видео-таныштырылгазының конкурузун эрттирген

 Тываның Баштыңы Шолбан Кара-оолдуң эгелээшкини-биле чарлаан Улусчу ужур-чаңчылдар чылында чоннуң езу-чаңчылдарының темазынга видеофильмнер конкурузунуң тиилекчилерин тодараткан. Конкурстуң организатору ТР-ниң Информатизация болгаш харылзаа яамызының дыңнатканы-биле алырга, жюриниң шииткелинге аңгы-аңгы угланыышкынныг 23 конкурс чагыы кирген. Кыска хемчээлдиг видеосюжеттерге мал болгаш чер ажыл-агыйының, аас чогаалының, аңнаашкын, национал идик-хеп культуразының, тываларның этноэкологтуг философиязының, өг-бүле үнелелдериниң, ыдыктыг черлер болгаш болуушкуннарның, чоннуң этниктиг онзагайының дугайында көргүскен. 

 Таңды кожууннуң Сосновкадан «Октаргай» экологтуг клубтуң кежигүннериниң белеткээни «Оваа дагылгазы» деп беш митута хемчээлдиг ажылы эң-не эки деп үнелеттинген. Ында тываларның бурунгу ужуру – оваа дагыырының дугайында чугаалап турар. Суг баштарынга, даглар шыпшыынга, арт кырынга овааларны кижилер даштарны салып тургаш, чыырын, бир талазында - ол ол черниң ээзинге чалбарып турарын, өскезинде – оваа ол ээниң оран-чурту болу бээрин тайылбырлап турар. Оваа дагылгазының езулалын чыл санында чайның ортан үезинде, оът-чимис четчип эгелээрге, чер-суг ээлеринден чаагай дүжүттү дилеп алыр дээш эрттирери-биле холбаалыг. Бөгүнде ол езулал аңгы-аңгы төрел аймактарны каттыштырган, хөйнүң байырлалы апарганын көргүскен.

 Тываның агротехнология техникумунуң сургуулдарының «Тываларның чаңчылчаан аңнаар аргалары» база Кызылдың № 5 гимназиязының өөреникчилериниң «Скифчи күзел» деп ажылдары конкурстуң шаңналдыг черлерин ээлээн. Тываның көдээ ажыл-агый техникуму улусчу ужур-чаңчылдарны доктаамал өөренири дээш, Ак-Довурактың даг техникумунуң «Тываларның этноэкологтуг билиишкини» таныштырылгазы дээш, Кызылдың №9 гимназиязының чедиги классчызы Сюзанна Куулар - «Тыва чоннуң этниктиг онзагайы» деп ажылдары тускай шаңналдарга төлептиг болган.