Сарыг-Септе cпортчу төптүң тудуу график езугаар чоруп турар

 Аныяктар херээ болгаш спорт сайыды Юрий Ооржак Сарыг-Сеп суурда спортчу тудугну хынап четкен. «Тудуг ажылдары график езугаар чоруп турар. Бо чылдың декабрьда тудугну доозарын тудугжулар Тываның Баштыңы Ш. Кара-оолга аазаан. Кожуун төвүнүң чурттакчылары ойнаар, белекенир болгаш хүрежир залдарга чыл төнчүзүнде барып эгелээр» - деп сайыт Фейсбукта дыңнаткан. 

 «Күш-культура болгаш спорттуң хөгжүлдези» РФ-тиң күрүне программазында «2006-2015 чылдарда РФ-те Күш-культура болгаш спорттуң хөгжүлдези» федералдыг тускай сорулгалыг программаның күсели-биле спортчу объектини тудуп турар. 

 Беш ээлчегниң бирээзинде-ле 150 кижи кээр спортчу төптү төлевилел езугаар туткан. Спортчу өргээге спортчу болгаш белеткенир залдар, спорттуң аңгы-аңгы хевирлеринге уругларга секциялар, улуг эвес чемненир чер, сауна болгаш душ турар.

  Тываның Баштыңы чурттакчы чонну, ылаңгыя элээдилерни күш-культураның массалыг кичээлдеринге, спортче хаара тударынга инфраструктураны хөгжүдер сорулганы салганын сагындыраал. Аныяктар херектери болгаш спорт яамызы, муниципалдыг тургузуглар база спортчу организацияларның кол сорулгазы – туттунган объектилерни кадагалап, боттуг ажыглаарын чедип алыры болур. Спорт албан черлери бирги ээлчегде өскүс уругларга, эвээш орулгалыг болгаш хөй ажы-төлдүг өгбүлелерниң ажы-төлүнге чедингир болур ужурлуг, деп Шолбан Кара-оол негелдени салган.