Тываның Баштыңы Кызылдың чылыдылга-энергетика төвүнүң кышка белеткелин хынаан

 Тываның Баштыңы Шолбан Кара-оол ЧЭТ-ке четкен. Чыл санында кыш бертинде чаа одалга сезонунга бүдүрүлгениң беленин хынаары - Тываның Баштыңынга чаңчыл болган. Амыдырал-хандырылга объектизинде дериг-херекселдерни септээри дээш, бүгү планнаттынган белеткел ажылдары күүсеттингенин регионнуң удуртукчузунга ЧЭТ-тиң чиңгине директору Андрей Троцан илеткээн. 

 Кызылдың ЧЭТ-тиң келир кыштың одалга сезонунга белеткелин хынаары-биле тускай комиссия ында ажылдап турар. Ооң составында ТР-ниң Энергетика яамызының, ЧЭТ-тиң бажында албан чери – «Сибирская генерирующая компанияның», ТР-де Ростеххайгааралдың, ТР-де ХК база ОБ агентилелиниң, Кызыл хоорай мэриязының төлээлери кирген. Кышкы үени бүдүрүлгеге онза байдалдар чок эрттирери база найысылалдың чурттакчыларын чылыг-биле үзүктел чок хандырары – ниити сорулга ол. 

 Бүдүрүлгениң беленин хынаарының кол негелделеринде – чылыг четкизиниң дериг-херекселиниң техниктиг байдалы, өртке удур айыыл чок чорук, күш-ажыл камгалалының негелделерин күүседип турары, онза байдалдарда организацияның ажылдакчыларының чорудуунуң алгоритми кирген. ОБ үезинде дижик – объектиниң иштинде өрт өөскээш, бир котелдуң сандан үнгенинден, сугнуң температуразы кудулаан таварылгада ЧЭТ-тиң ажылдакчыларының хөделиишкининиң тренировказын Тываның Баштыңы көрген. Коллектив мурнунда салган сорулгазын күүседип, хоорайның чурттакчыларын чылыг-биле хандырарынга курлавыр котелду үезинде кошкан.

 Шолбан Кара-оол бүдүрүлгениң девискээрин кезип көрген соонда, Кызылдың ЧЭТ ажылдакчылары-биле конференц-залга ужурашкан. Одалга сезонун онза байдалдаp чок эрттирер дээш ажылдап турарларны серемчилелдиг база ажылынга харыысалгалыг болурунче кыйгырган. Найысылалдың социал чаагай чоруу бүдүрүлгениң коллективиниң ажыл-чорудулгазындан дыка хамаарылгалыг дээрзин чазак даргазы демдеглээн. Кызылдың ЧЭТ-тиң кышкы үеде ажылдаарынга кайы хире беленинге демдекти салыры-биле, комиссия хыналдазын неделя төнчүзүнге чедир чорудар.