ЦСКА-ТЫВА СДЮСШОР баазазынга Виктор Анның дүүштүрүлгези-биле шорт-трек школазы ажыттынар

 Кадеттерниң президент училищезиниң баазазынга ол спортту ажыдар. Төлевилелдиң кол дүүштүрүкчүзү алды дакпыр олимпий чемпиону Виктор Ан болур – деп, Сочиге Олимпий оюннарының маадыры-биле чугаа соонда Тываның Баштыңы Шолбан Кара-оол ВКОНТАКТЫда арынынга бижээн. – Спортту деткип, Тывага келгени дээш Викторга кызыгаар чок четтиргеним илереттим!» 

  Сентябрь 12-де ажыттынган «ЦСКА-ТЫВА» школа деткимче алыр спортчу хевирлерни ам-даа калбартыр. Шорт-трекке Виктор Анның тиилелгезиниң соонда, бүгү Россияда ол спортчу хевирниң муң-муң мөгейикчилери немежип, Азияның төвүнде Тывага шорт-тректиң бурунгаар сайзыралы эгелээн. Сочиге Олимпиада эрткен соонда, Тывада «Субедей» спорт комплекизиниң баазазынга, шорт-трекке элээн каш маргылдаалар болганын сагындыраал. 

 Бүдүн чартык чыл бурунгаар, «Субедей» спорт комплекизиниң доштуг чуңгузунга, Тыва Республиканың яамылар болгаш ведомстволар ажылдакчыларының комплекстиг спартакиадазында шорт-трекке база конькилиг дүрген чарышка сайыт Юрий Ооржактың баштааны Чазак Аппарадының ажыдакчылары шылгараан. 

 Бо чылдың февральда, XXII кышкы Олимпий оюнарының бир чыл болганынга тураскааткан командалар аразының шорт-трек маргылдаазынга, коньки-биле чарышка 12 команда аразындан Валерий Ховалыгның удуртканы Тыва Республиканың Хамааты камгалал болгаш онза байдалдар агентилелиниң командазы эң дүрген маңнаан. 

 «Субедей» спорт комплекизиниң директору Мерген Соловьев, бо хонуктарда дош соодар дериг-херекселдерни солудуп, чаа элементилерни салдырып турарын, Тува-Онлайн МА-га дыңнаткан. Доштуг залда чаа хөгжүм-чырык дериг-херекселин салган. Дошка фигурлуг чуңгулаашкынның спортчулары солун композицияларны ам салыр аргалыг апарган. Сентябрь төнчүзүнге чедир дериг-херекселдерни салып доозуптарга, фигурлуг чуңгулаашкын база шайбалыг хоккей секциялары ажылын катап эгелээр.

 Тывада спорттуң чаа хевирлерин сайзырадырынга республикага чаа спортчу объектилерни – эштир бассейннерни, чуңгуларны, залдарны ажыглалга киирери чугула деп, регионнуң Баштыңы Шолбан Кара-оол 2008 чылда сорулга кылдыр салганын сагындыраал.