«Азияның төвүнде хөөмей» бүгү чоннар мөөрейинге 200 ажыг хөөмейжи киржир

   «Азияның төвүнде хөөмей» бүгү чоннар мөөрейинге 200 ажыг хөөмейжи киржир Августуң 10-14 хүннеринде республика найысылалынга «Азияның төвүнде хөөмей» I бүгү чоннарның фестивалы болуп эртер. Мөөрейге Россиядан, Испания, Италия, Франция, АКШ, Финляндия, Нидерланды, Турция, Кыдат болгаш Япониядан 200 ажыг бөлүктер болгаш хөөмейниң күүседикчилери киржир. 

 Россия Федерациязының регионнарындан алтай кайчы Болот Байрышев, билдингир якут этно-бөлүк «Айархаан», «Байкал» бурят театр, Хакасиядан «Ульгер» фольклор ансамбли кээр. Фестивальда Тываны чүс ажыг күүседикчилер болгаш 28 ансамбльдар төлээлээр. Шупту киржикчилер тиилелге дээш үш аңгы номинацияга мөөрейлежир: «Чаңчыл болган чаңгыстың күүселдези», «Чаңчылчаан ансамбль», «Амгы интерпретацияда хөөмей».

 Фестивальдың программазында «Алдын-Булак» этно-культура комплекзинде оваа дагыыр чаңчылчаан езулал, Чаңчылчаан тыва культураның болгаш ус-шеверлелдиң хөгжүлде төвүнде база Кызыл хоорайның эрик чоогунда «Азия төвү» архитектурлуг-скульптура комплекизинде ажык сценага күүседикчилерниң конкурстары бар. Август 13-те В.Көк-оол аттыг национал хөгжүм-шии театрынга тиилекчилерни шаңнап, фестивальды байырлыг езу-биле хаар. 

 Тыва хөөмей-сыгыт бурун шагдан бээр чоннуң культуразының кайгамчыктыг эртинезинге хамааржыр. Назынында оода чаңгыс катап хөөмейлээрин шеневээн оол чок деп, тывалар чугаалажыр. Бичии чаштан эгелээш ушпа кырганга чедир, республиканың чурттакчылары хөөмейниң бүгү хеверлерин ылгап билир. Кайгал-оол Ховалыг, Ондар Коңгар-оол, «Тыва кызы», «Алаш», «Чиргилчин», «Ят-Ха» ансамбльдар болгаш бөлүктерниң ады чүгле Тывада эвес, делегейде алгаан. 

 Тывада эң-не тулган хөөмей күүседикчизинге «Тыва Республиканың улустуң хөөмейжизи» атты тыпсып турар. Бөгүн ындыг бедик күрүне шаңналын эдилеп чоруур 13 хөөмейжи республикада бар. 

 Тываның Баштыңы Шолбан Кара-оол хөөмейниң мөгейикчизи болгаш, хөөмей-сыгттың бүгү-делегей конкурузун республикага эрттирер саналды киирген. Билдингир «Алаш» этно-бөлүк-биле ужурашкан соонда ол бодал төрүттүнген. Республика Баштыңы 2015 чылды Улусчу чаңчылдар чылы кылдыр чарлааш, тыва чоннуң бот-тускайлаңын болгаш культуразын кадагалап арттырарынга бир онзагай кыйгырыг кылдыр, Тывага хөөмей фестивалын эрттирерин шиитпирлээн.