Тываның корум-чурум тудукчулары байырлал хүннеринде кем-херек үүлгедиишкинерин болдурбаан

 Тываның Баштыңы Шолбан Кара-оолдуң удуртулгазы-биле селектор хуралга «Наадым-2015» малчыннарның, Даа кожууннуң 250 чылының база «Үстүү-Хүрээ» дириг хөгжүм болгаш чүдүлге фестивалы байырлалдарның эрткениниң түңнелин чугаалашкан. 

 Байырлал хемчеглерин эки белеткеп, эрттиргени дээш Чөөн-Хемчик кожуун чагыргазынга, ол хүннерде аар кем-херек үүлгедиишкиннерин болдурбаан шынарлыг ажыл-чорудулгазы дээш республиканың корум-чурум камгалаар органнарынга, ТР-де ОБЯ-ның кол эргелелинге, ТР-ниң Культура яамызынга база «Үстүү-Хүрээ» фестивальдың оргкомитединге Тываның Баштыңы өөрүп четтиргенин илереткен. Эрге-чагырганың бүгү деңнелдери республика хемчээлдиг улуг хемчеглерни организастаанын база катап анализтеп, ооң белеткеп, эрттиреринге идепкейлиг киришкен кижилерни деткиирин сүмелээн. 

  Ылаңгыя «Үстүү-Хүрээ» фестивалын ол онзалап демдеглээн: «16-гы фестиваль бистиң республикавыска онзагай болуушкун болган – чурттуң 128 хоорайларындан, Америка, Мурнуу Көрея, Голландия болгаш өске-даа чурттардан аалчылар келген. Езулуг интернационалчы найыралдың байырлалы чүнү шыдаарывысты база чүнү канчап болурувусту көргүстү. Мында чыглып келген кижилерниң бот-боттарынга онза хүндүткели чуртталгаже эки көрүштү оттуруп, күчү-күштү берип, келир үеже чаа угланышкынныг октагны берген дээрзинге бүзүрээр мен».