Тыва хүрешке шүүлген Айдемир Монгушка «Арзылаң мөге» атты тывыскан

Чоннуң «Наадым» байырлалында 128-тен эвээш эвес мөге хүрешкен Тыва Республиканың тыва хүреш маргылдаазынга үш удаа шүүлген ийикпе азы беш удаа шаңналдыг черлерже (ийиги, үшкү) кирген спортчуга «Тыва Республиканың Арзылаң мөгези» хүндүлүг атты тыпсыр.

  Кызыл кожууннуң Шамбалыгдан Айдемир Монгуш - Наадымнарның 17 дакпыр чемпиону Аяс Монгуштуң чээни. Бо чылдың Наадым хүрежиниң түңнел сегиржип алыышкынга Сүт-Хөлден Эрес Кара-Салды октааш, ол шүүлген. Ооң шаңналы – Лада гранта автомашина. Үшкү, дөрткү черлерни Сайын-Белек Тюлюш биле Буян Бурбужук үлешкен. 

 Республиканың Баштыңы Шолбан Кара-оол, Дээди Хуралдың спикери Каң-оол Даваа, «Хүреш» федерациязының президентизи, чазак даргазының оралакчызы Анатолий Дамба-Хуурак, Чөөн-Хемчик кожуун чагыргазының даргазы Байбек Монгуш олар шаңналдарны тывыскан.