Тывада Наадым үезинде Кызылдан болгаш алды кожуундан эмчилерниң тускай командазы ажылдаар

 Июль 23-25 хүннеринде Чадаана хоорайга эртер малчыннарның Наадым байырлалында эмчи хандырылгазының дугайында чугааны Кадык камгалал яамызынга чоруткан. Чылдың-на ол хемчегге 10 муң ажыг киржикчилер болгаш көрүкчүлер чыглып кээр болгаш, республиканың эрге-чагыргазы 3 хонуктуң дургузунда хондур-хүнзедир дежурныйлаар тускай эмчи бригадазын тургускан. 

 Бо чылын Чөөн-Хемчикке эртер малчыннарның Наадымынга оон-даа хөй кижилер кээри магат чок, чүге дизе аңаа ийи улуг хемчег база катчы берген: Даа кожууннуң 250 чылы база бир чыл дыштанган соонда катап эгелээн дириг хөгжүмнүң «Үстүү-Хүрээ» фестивалы. 

 Яамының шиитпири-биле, Наадым үезинде ажылдаар эмчи бригадазында республика поликлиникаларының, Кызылдың дүрген эмчи дуза станциязының, Катастрофаларның медицина төвүнүң, Чөөн-Хемчик, Барыын-Хемчик, Өвүр, Сүт-Хөл, Улуг-Хем, Чаа-Хөл кожуун эмнелгелериниң эмчилери кирген. 

 Оон аңгыда «Кадыкшылдың маршруду» төлевилел-биле ажылдап турар көжүп чоруур медицина төптери база ол хонуктарда ажылдаар. Байырлал хемчеглериниң девискээринге республиканың булуң бүрүзүнден келген малчыннарның эмчи шинчилгезин эрттирер. Республиканың медицина профилактиказының төвү малчыннар найырында чыглып келген муң-муң кижилерге амыдыралдың кадык овур-хевиринге хамаарыштыр суртаал ажылын база чорудар. Аарыгларны болдурбас дээш хемчеглерни алырының, аарыгны үезинде тодарадып ону чедимчелиг эмнээриниң дугайында өөредиглиг чугааны специалистер кылыр