22.12.2014
Декабрь 10-да Орус культура төвүнге 2015 чылда болгаш 2016-2017 чылдарда планныг үеде Кызыл хоорайның бюджединиң хөй-ниити чугаалажыышкыннары болган. Хуралды Кызыл хоорайның баштыңы – Төлээлекчилер хуралының даргазы база хоорайның бюджединиң хөй-ниити чугаалажыышкыннарының комиссия даргазы Дина Оюн удуртуп эрттирген.
Хуралга 2015 чылда база 2017 чылга чедир хоорайның социал-экономиктиг хөгжүл- дезиниң дугайында илеткелди Кызыл хоорайның чагырга даргазының экономика талазы-биле оралакчызы Аян Серен-Доржу, Кызыл хоорайның 2015 чылда база 2016-2017 чылдарда бюджединиң баш бурунгаар планнаашкынының дугайында Кызыл хоорайның саң-хөө департаментизиниң даргазы Кежик-оол Тулуш база Кызыл хоорайның Төлээлекчилер хуралының хыналда комитединиң даргазы Валерия Кыргыс тус-тус илеткелдерни кылганнар.
2015 чылда бюджет планнаашкыны езугаар хоорайның ниити орулгазы — 2 305 496,1 муң рубль, а ниити чарыгдал – 2 344 205,1 муң рубль. Бюджетке чедишпес акша — 38 709 муң рубль.
2016 чылда бюджет езугаар Кызыл хоорайның ниити орулгазы – 2 376 640 муң рубль, а ниити чарыгдал – 2 416 074 муң рубль. Чедишпес акша — 39 434 муң рубль.
2017 чылда ниити орулгазы – 2 072 108 муң рубль, а ниити чарыгдалы – 2 113 469 муң рубль болза, чедишпес акша — 41 361 муң рубль.
Чоннуң айтырыгларынга хоорай чагыргазының даргазы Дина Оюн болгаш ооң оралакчылары харыылаан.
ТР-ниң Дээди Хуралының депутады Иван Чучев чоннуң мурнундан дараазында айтырыгларны салган:
— Хоорайның ниити чуртталга бажыңнарында чон берге байдалда чурттап турар, чаа бажыңнар-биле кажан хандырарыл? Хоорайның оң болгаш солагай талакы дачаларындан чоннуң аргыжылгазының берге байдалда турарын шупту билир бис. Аңаа хамаарыштыр кандыг хемчеглер көрдүнүп турар?
Айтырыгларга Кызыл хоорайның чагырга даргазының бирги оралакчызы Уран-оол Ондар харыылаан:
— Чуртталга бажыңнары туттунуп турар, ам-даа туттунар. Хоорай иштинге аргыжылга — хүннүң чидиг айтырыы. Маңаа хамаарыштыр хомудалдыг, санал-оналдыг чагаалар, билдириишкиннер биске неделя санында кээп турар. Бар транспортту доозазын ажыглап турар бис, ынчалза-даа чедишпейн турар. Хоорайның чагыргазы база ынаар сагыш салып, 8 автобусту садып алырының айтырыын көрүп турар. Декабрь төнчүзүнде түңнели билдине бээр. АТП-ниң автобустарын база дачаларже салырының дугайында дугуржулга чоруп турар.
Хоорайның солагай талакы дачаларында 15 муң хире кижи чурттап турар. Уруглар сады тударының аргазы кандыг дээрзин Иван Чучев айтырды.
— Хоорайның солагай талакы дачазынга уруглар сады кылыры амдыызында болдунмас. Чүге дээрге ол ногаа-чимис тарыырынга көрдүнген чер бооп турар. Дачаларда чон чүгле чайын эвес, а кыжын база чурттап турар апарган. Ынчангаш Кызыл хоорайның бир округу кылдыр кылыр арганы хоорай чагыргазы өөренип көрүп турар. Бир эвес хууда уруглар сады барып турар уругларлыг ада-иелер ол уруглар садының тускай лицензиязы бар болза, ындыг таварылгада уругнуң ада-иези күрүнеден компенсацияны алыр.
2015 чылда школаларга чединмес өг-бүлелерниң уругларын изиг чем-биле чемгереринге тускай акша көрдүнген бе дээрзин 10 дугаар школаның төлээлери айтырды.
— 2015 чылда өөредилге эргелелинге 3 млн. 500 рубль көрдүнген.
Уруглар садтарының ажылдакчыларының шалыңын кажан өстүрериниң дугайында уруглар садының ажылдакчылары айтырды.
— Амдыызында шалың өстү-рери көрдүнмейн турар.
2015 чылда бир дугаар оочурда Красноармейская, ооң соонда Ангарский бульвар дээш ниитизи-биле 4 кудумчунуң оруктарын септээри бюджетте көрдүнгениниң дугайында Кызыл хоорай чагыргазының бирги оралакчызы Уран-оол Ондар дыңнаткан.
Класс фондузу, камгалал дээш, оон-даа хөй чүүлдерге акша чыыры ада-иелерге нарын айтырыг болу берген, аңаа тускай акша көрдүнүп турар бе дээрзин бөлүк ада-иелер айтырды.
— Септелге ажылдарынга, саваң, порошок, чылыг, чырык дээн ышкаш чарыгдалдар хоорай бюджединде кирген. А класс, школа фондузу дээн ышкаш чарыгдалдар ада-иелерниң боттарының күзели-биле болур — деп, Кежик-оол Тулуш харыылады.
Хөй айтырыгларга харыыларны бергениниң соонда, 2015 чылдың хоорай бюджедин чыглып келген чон бир үн-биле деткээн.
Айдың Ондар.