22.12.2014
Россияның чоннарының хүрештериниң чаңчыл болган хевирлериниң IX фестивалынга тыва мөге тулган чемпион болган.
2014 чылдың декабрь 6-да Иван Ярыгин аттыг хүреш ордузунга Россияның чоннарының хүрештериниң чаңчыл болган хевирлериниң IX фестивалы болган, аңаа Москва хоорайның национал-культура болгаш чаңгыс чер-чурттуглар каттыжыышкыннарының бирги чери дээш база бухэ барилдаан деп бурят хүрешке бирги чер дээш маргылдаалар болган. Ол ышкаш хапсагай деп якут хүрешти бо чылын фестивальга бир дугаар киирген.
Чыл санында эртип турар ол спортчу ужуражылга Россияның болгаш даштыкының аңгың-аңгы регионнарындан эң шыырак спортчуларны чыып турар. 2014 чылда база ындыг болган. Фестивальга 121 спортчу киришкен, Москваның национал-культура болгаш чаңгыс чер-чурттуглар каттыжыышкынын төлээлээн 21 команда чагыг киирген.
Деңзи аайы-биле үш категорияга (70 кг чедир, 80 кг чедир болгаш 80 кг-ден өрү) болуп эрткен маргылдааның түңнелинде тус-тус спортчуларның-даа, командаларның-даа аразындан тиилекчилер болгаш шаңнал ээлекчилери илереттинген. Тиилекчилерге Москва хоорайның регионнар аразынга кады ажылдажылга, национал политика болгаш шажын организациялары-биле харылзаалар департаментизиниң кубоктарын, медальдарын база дипломнарын, а ол ышкаш РФ-тиң ФХ-ниң Күрүне Думазының депутады И.Э.Матхановтуң, Кавказтың чоннарының российжи конгрезиниң президентизи А.Х.Тоторкуловтуң, Саха (Якутия) Республиканың хапсагай хүреш федерациязының президентизи Н.И.Румянцевтиң, «Даши Намдаковтуң чогаадыкчы мастерскаязы» КХН-ниң чиңгине директору А.А.Бурзановтуң, Бурятия Республиканың Улус Хуралының төлээзи П.А.Улахановтуң, «Уряал» бурят культура ниитилелиниң» регион салбырының даргазы Б.Д.Дугаровтуң тургускан үнелиг белектерин тывыскан.
Бо чылын бухэ барилдаан талазы-биле маргылдааның түңнели-биле илереттинген IX фестивальдың тулган чемпиону атты тыва мөге Айдың Монгуш чаалап алган, аңаа «Новый поток» ниитилелиниң (ниитилелдиң президентизи Ю.В.Навражный) тускайлаан кол шаңналы — 100.000 рубльди тывыскан.
Оон аңгыда фестивальдың маргылдааларынга шаңналдыг черлерни Тываның өске-даа мөгелери чаалап алганнар. Чижээ, Михаил Алдын-оол (70 кг чедир деңзиге) болгаш Чиңгис Бадыраа (80 кг чедир) за-вороток деп орус хүрешке тус-туста мөңгүн болгаш хүлер шаңналдарны чаалап алганнар. Бухэ барилдаан деп бурят хүрешке 70 кг чедир деңзиге хүрешкеш, Бады-Сагаан Монгуш биле Алли Долба бирги болгаш ийиги черлерни үлешкеннер. Хүрештиң ол-ла хевиринге мөңгүн болгаш хүлер шаңналдар Артыш Шөмбүл биле Чиңгис Бадыраа оларга онаашкан, а Айдың Монгуш 80 килограммдан өрү категориялыг мөгелерниң аразынга эң күштүг болган.
Якут хүреш хапсагайга тыва мөгелерге чедер кижи чок болганын демдеглээр апаар. 80 кг чедир мөгелерниң аразындан Айдың Дун биле Артыш Шөмбүл олар бирги, ийиги черлерни ээлээннер. Аар деңзилиг мөгелерден Айдың Монгуш түңнел маргылдаага бурят Цыбик Максаровту, Якутиядан келген, хүрештиң ол хевиринге аштырар кижи чок деп санаткан Афанасий Старостинни октааш, тиилекчи болган.
Команда аайы-биле тывалар за-вороток деп орус хүрешке — ийиги черни, бурят бухэ барилдаанга үшкү черни ээлээн болгаш якут хүреш хапсагайга чемпион болганнар, якуттар боттары чүгле хүлер шаңнал алганнар.
Москва хоорайның регионнар аразынга кады ажылдажылга, национал политика болгаш шажын организациялары-биле харылзаалар департаментизиниң албан-езузунуң сайтызында медээлерден.