Тыва Республиканың Баштыңы Петербургтуң бүгү делегей чергелиг экономиктиг форуму - 2014 - түң ажылында киржип турар

    Тыва Республиканың Баштыңы Шолбан Кара - оол бо хүн Санкт - Петербургта болуп эгелээн Петербургтуң бүгү делегей чергелиг экономиктиг 18 - ки форумунуң ажылында киржип турар. Форумга “Элегест - Курагино - Кызыл” деп демир - оруу тудуунуң төлевилелин таныштырар.Тудугну кылыр Тываның Энергетиктиг Үлетпүр корпорациязы (ТЭПК) биле Россияның банкларының аразында дугуржулгаларга ат салыры көрдүнген. Оон аңгыда, Россияның экономиктиг сайзыралының яамызының удуртулгазы  Национал чаагай хөгжүлде байдалының Фондузундан акшаландырар талазы - биле  ат салган бадыткалды Россияның саң - хөө яамызынче чоргузар.

    Майның 22 - 23 хүннеринде болуп эртер форумнуң ажылынга Росияның Президентизи Владимир Путинниң киржилгези - биле эртери көрдүнген. Бо удаада  Петербургтуң бүгү делегей чергелиг экономиктиг 18 - ки форуму “Чаарттылгалар үезинде бүзүрелди күштелдирери” деп угланыышкынныг эртип турар. Тыва Республиканың Баштыңы Шолбан Кара - оол бодунуң “Вконтакте” деп социалдыг четкиде арнында мындыг медеглелди бо хүн  бижээн: “Бүгү делегей чергелиг экономиктиг форумга киржири - биле Санкт - Петербугта чедип келдим. Улуг чергелелдиң чыыштарынга Тываның туружун камгалаары - эң - не чугула ”.

     Санкт - Петербург хоорайже Тываның Баштыңы Кыдаттан ужуп чедип келген. Аңаа Россияның Президентизиниң удуртканы ажылчын бөлүктүң кежигүнү кылдыр чораан.