Тывада марттан июньга чедир саргы энцефалиди-биле аараан 5 таварылга бүрүткеттинген

11.06.2024 Тывага эпидемиологтуг сезон эгелээнден саргыга ызырткан 645 кижи дуза дилеп келген. Аарыг нептередикчинге ызыртканындан аараан 32 кижи барын Роспотребнадзонуң регионалдыг эргелели республика чазааның аппарат хуралында дыңнаткан.

Хоранныг саргыга ызырткан 15 кижиниң бирээзинде саргы риккетсиозу, азы шивишкилээр сибирь тифи илереттингенин эмчилер дыңнаткан. 12 кижиде боррелиоз, азы Лаймның аарыы тывылганын анализтери көргүскен. Бо халдавырлар өлүмнүг эвес бол, нерв системазынга, чүстерге, чүректерге база хан-дамырга халалыг.

Саргы аарыгларындан эң айыылдыы – саргы энцефалидинден 5 кижи когараан. Бо вирус кижиниң төп нерв системазынга дээр, амдыызында аңаа удур эмнер чок. Азы саргы энцефалидинден аараан кижи иммунитедин быжыглаар терапияны алыр. Ынчангаш энцефалит халдавыры хоочулуг аарыг кижилерге айыылдыг, чартыктап азы амы-тынындан чарлып болур.

Республиканың вирусология лабораторияларның ажылдакчыларының ПЦР шинчилелдеринден алырга, аараан кижилер санындан аңгыда, хоранныг саргыларның көвүдээни, чурттакчы чонну кичээндирер ужурлуг.

Эпидемиологтарның шинчилеп көргени 2,8 муң саргының оннуң бирээзинде-ле бир-ле аарыгны өөскүдери билдинген.
18 саргыда саргы энцефалидиниң, 120 – боррелиозтуң халдавыры илереттинген. Оон аңгыда шивишкилээр сибирь тифинге хамааржыр эрлихиоз (85) база анаплазмоз (41) халдавырлары бар болган.

Тываның Баштыңы Владислав Ховалыг бойдуста саргыларның тарадып турары халдавырларга база ооң уржуктарынга удур ажыл-чорудулганы хынаар даалганы берген. Чүгле айыылдыг бөлүкте кижилерни тарыыры-биле кызыгаарлаттынмас. Кижилер хөй чыглыр черлерни, уругларның кадыкшылга лагерьлериниң девискээрлерин саргыга удур хораннаанын хынаар.

Саргыга ызырткан улус дүрген эмчи дузазын каяа алырын дыңнадыр. Эмнелге черлерин саргы энцефалидинге удур тарыыр чүүлдер-биле хандырар. Херек апарган таварылгада ол эмнер аптекага база турар ужурлуг.