ВТБ банк регионалдыг төлевилелдер боттандырыышкынын деткиир

Июньнуң 6-да Петербургтуң экономиктиг шуулганының үезинде, Тыва Республиканың Баштыңы Владислав Ховалыг биле ВТБ банкының президентизи - баштаар чериниң даргазы Денис Бортников кады ажылдажылга керээзин чарган.

Ийи тала республика девискээринге кады ажылдажылганы сайзырадырын дугурушкан. Республиканың найысылалы – Кызылдың чурттакчыларынга саң-хөө ачы-дуза чедирилгезинге эптиг байдалды тургузар сорулга-биле ВТБ бодунуң бирги офизин регионга ажыдар. Оон аңгыда банк күрүне деткимчезиниң аргаларын ажыглавышаан, Тываның девискээринде мурнады боттандырар төлевилелдерге, регионалдыг компанияларның хөгжүлдезинге, чуртталга тудуунга, биче болгаш ортумак сайгарлыкчы чоруктуң акшаландырыышкынынга киржир планныг.

“Тыва Республика бо чоокку чылдарда үлетпүр күчү-шыдалын улгаттырып, инвестиция климадын өстүрүп, биче болгаш ортумак бизнести деткип, көдээ ажыл-агыйын хөгжүдер улуг сорулгаларлыг. ВТБ банк регионнуң мурнады боттандырар төлевилелдерин кады боттандырарынга белен. Ынчангаш республиканың чурттакчы чонунуң чаагай чоруун экижидер сорулгалыг улуг ажылдар мурнувуста хөй» — деп, Денис Бортников чугаалаан.

ВТБ банк регионга албан езузу-биле ажылдавайн тургаш-ла, “Карак чажы чок делегей” деп боттарының ачы-буян программазынче Тываны 2023 чылда киирип, социал ужур-дузалыг ажылды чорудуп турарын Тываның Баштыңы демдеглээн. Ол программа деткимчези-биле республиканың уруглар эмнелгези сурдологтуг болгаш офтальмологтуг дериг-херекселдер комплекизин алган.