Тываның Баштыңы Владислав Ховалыг «Космос Отель Групп»-туң президентизи Александр Биба-биле дугуржулга керээзинге атты салганнар

06.06.2024 Тываның Баштыңы Владислав Ховалыг бөгүн Петербургтуң делегейниң экономиктиг шуулганының үезинде «Космос Отель Групп» президентизи Александр Биба-биле керээни чарган. Республиканың удуртукчузу ооң дугайында бодунуң блогунда дыңнаткан.

Александр Биба-биле чаңгыс эвес удаа ужуражып, Кызылга үш сылдыстыг аалчылар бажыңын тудар инвестиция төлевилелин сайгарып чугаалажып турганын Владислав Ховалыг демдеглээн.

«Кужугет Шойгу аттыг фондунуң удуртулгазы-биле туткан Россияда эң улуг «Тубтен Шедруб Линг» сарыг шажын хүрээзинге ол комплексти тудар. Хүрээ буддийжи архитектура үнелекчилериниң база делегейде сарыг шажын чүдүкчүлериниң улуг сонуургалын хаара тудуп турар. «Тубтен Шедруб Линг» аян-чорукчуларны сорунзалаан күштүг чер апарган.

Тываның турисчи арга-хевирлерин калбартыры-биле аалчылар хүлээп алыр инфраструктураның шынарын экижидип, сайзырадыры чугула апарган. Ынчангаш амгы үениң гостиница комплекстерин тудары чугула. Улуг болгаш ужур-дузалыг төлевилелди амыдыралга боттандырар дээш бистиң республиканы шилип алган делегейде сурагжаан «Космос Отель Групп»-туң удуртулгазынга четтиргеним илередип тур мен» - деп, Владислав Ховалыг чугаалаан.