Россияның “бичии эзирлери” Ийи-Талга ужуп кээр

Июньнуң 5-тен 25-ке база июньнуң 28-тен июль 18-ке чедир Улуг-Хем кожууннуң Ийи-Тал суурда Аграрлыг школа-интернатка «Россияның бичии эзирлериниң кады ажылдажылгазы» өөредилге программалыг сменалар бир дугаар болуп эртер.

 Организаторларның медээзи-биле алырга,регионалдыг Өөредилге яамызы, бичии чаштар навигаторлары база школа-интернат коллективи 1-4 класстарның 100 хире өөреникчилерин республиканың тускай угланыышкынныг сменазынче  хаара тудар.

Сезон иштинде, азы 21 хонук дургузунда, уруглар болгаш улуг кижилер патриотчу кижизидилгеге база активчи хамааты турушка тураскааткан практиктиг оюннарга, мастер-класстарга киржирлер.

"Бистиң школаның баазазынга бүгү-российжи смена ажылдаар болганынга өөрүп тур мен. Февральда-ла лагерь ажыдыышкынга белеткел эгелээн. Өөредилге яамызының база Баштайгылар шимчээшкининиң организастааны өөредилгелер болуп эртер. Чөпшээрел документилерин бадыладырының сөөлгү ажылдары чоруп турар" – деп, Ийи-Талдың аграрлыг школазының кижизидилге талазы-биле директорнуң оралакчызы Олеся Монгуш чугаалаан.

Тываның күрүне университединиң база Кызылдың башкы колледжизиниң студентилери сменага вожатыйлар бооп ажылдаарлар. Июньда школага болуп эртер Россияның бичии эзирлери шуулганга Бурятия, Якутия база Красноярскыда Чаштар навигаторларның регионалдыг координаторлары кээп киржир.