Тывада өртке удур онза чурумну июнь 17-ге чедир узаткан

Тываның Чазааның доктаалы-биле июнь 17-ге чедир өртке удур онза чурумну узатпышаан, арга-арыгже эрттирилге бижиктиг кирерин чөпшээрээн.

Арга-арыгже кирерде бодунга база транспорт аймаанга эрттирилге бижик албан херек. ТР-ниң Арга-арыг болгаш бойдус ажыглалының яамызындан: Кызыл хоорай, Калинин кудумчузу, 1Б, 3-кү каът, 311 кабинет, ажылдаар шагы – ажыл хүннеринде 9:00 -13:00 шактарда, база кожууннарның арга-арыг ажыл-агыйларындан ону халас бижидип алыр.

Арга-арыгга одаг кыпсыры, бок өрттедири, өрт айыылын өөскүдүп болур ажылдар кылыры хоруглуг.

Өрт айыылының негелделерин сагываанда, дараазында торгаалдарга онаарын сагындыраал: хамаатылар – 40 муң рубль чедир, юридиктиг черлер – 500 муң рубль чедир.

Бөгүнге чедир, Россия Федерациязының Административтиг чурум үрээшкиннериниң дугайында хоойлунуң 8.32 чүүлү-биле чурум үрекчилеринге онааштыр тос административтиг херектерни оттурган. Арга-арыг өрттеринге буруулуг кижилерни илереткениниң дугайында 16 билдириишкинни иштики херектер органнарынче киирген. Амгы үеде олар хыналдада.  

Өрт айыылының сезону эгелээнден Тываның арга-арыг фондузунуң черлеринде 428,9 га черге 17 арга-арыг өрттери демдеглеттинген. Оларның 11-инде кижилер буруулуг. 

Республика девискээриниң арга-арыгларында хүн бүрүде арга-арыг инспекторлары дежурныйлап турар.

Бир эвес арга-арыгда өрт үнгенин эскерип кагзыңарза, 112 дугаар чаңгыс аай телефонче азы регионалдыг диспетчер албанының 8-(39422)-5-04-86 дугаарлыг телефонунче дыңнадырын утпаңар.