Тывада “Көдээ суурнуң башкызы” программа киржикчизи 13 башкыны шилээн

Эрткен неделяда Тываның Өөредилге болгаш эртем яамызынга “Көдээ суурнуң башкызы” программага киржир эргени алыр башкыны шилээн конкурс комиссиязының хуралы болуп эрткен.

93 кордакчы башкы конкурсче билдириишкиннерни киирген. Комиссия кежигүннери мөөрейниң шупту негелделеринге дүгжүр болгаш чогуур саннарны алган 13 башкыны шилип алганнар.

13 башкы чаа өөредилге чылының бүдүүзүнде, көдээ школаларның чарлааны хостуг олуттарже ажылдап чеде бээр. Бай-Тайга, Барыын-Хемчик, Чөөн-Хемчик, Каа-Хем, Кызыл, Өвүр, Бии-Хем, Сүт-Хөл, Таңды, Тес-Хем, Тожу, Чеди-Хөл, Эрзин кожууннарның школаларынга орус дыл болгаш чогаал, математика, физика, англи дыл, биология эртемнерин болгаш эге класстарны башкылап, чаа башкылар келир.

Конкурс шилилдезин эрте берген башкылар Тыва Республиканың Өөредилге болгаш эртем яамызы, өөредилге организацияларының удуртукчулары-биле үш таланың керээлерин чарып, атты салырлар.

“Көдээ суурнуң башкызы” федералдыг программа 2020 эгелээн болгаш, көдээ школаларже башкыларны хаара тударынче угланган. Көдээже көжүп, аңаа ажылдаарынга белен башкылар 1 млн рубль акша түңнүг төлевирни алыр.

Тываның Өөредилге болгаш эртем яамызы программага киржир күзелдиглерге бо чылын 13 олутту берген. Тывага программаны боттандырып эгелээн үеден бээр деткимчениң ол хемчээн 49 башкы алган.

Президент Владимир Путин “Көдээ черниң башкызы” төлевилелди 2030 чылга чедир узадыр шиитпирни үндүрген. Көдээ школалар бедик мергежилдиг, улуг арга-дуржулгалыг башкыларны хаара тудуп, өөредилгениң шынарын ынчалдыр экижидер аргалыг апарган.